नेपाल वायु सेवा निगमका एक पाइलटसहित ७ जनामा कोरोना संक्रमण पुष्टि भएको छ । 

विदेशमा अलपत्र नेपाली उद्धारमा खटिएका पाइलटसहित ७ जना कर्मचारीमा कोरोना पुष्टि भएको निगम स्रोतले जानकारी दियो । 

‘पाइलटसहित केही कर्मचारीमा कोरोना संक्रमण पुष्टि भएको छ, केहीबेरमा हामीले विज्ञप्ति प्रकाशित गरेरै यसबारे जानकारी गराउँदै छौं,’ निगम स्रोतले भन्यो ।

संस्कृति, पर्यटन तथा नागरिक उड्यन मन्त्री योगेश भट्टराईले नेपाल सरकारले दिएको जिम्मेवारी पूरा गर्ने क्रममा नेपाल वायुसेवा निगमका कर्मचारीमा कोरोना पुष्टि भएको उल्लेख गरेका छन् । 

‘नेपाल सरकारले दिएको जिम्मेवारी पूरा गर्ने क्रममा नेपाल वायुसेवा निगमका चालक दलका केही सदस्यमा कोरोना पोजेटिभ देखिएकोमा दुःख लागेको छ । संकटकालीन अवस्थामा उहाँहरूले गर्नुभएको कामको उच्च प्रशंसा गर्दछु । उहाँहरूको शीघ्र स्वास्थ्यलाभको कामना गर्दछु,’ भट्टराईले सोमवार ट्वीटरमा सन्देश लेखेका छन् । 

पछिल्ला दिनमा सरकारले विभिन्न देशमा अलपत्र नेपाली कामदारलाई नेपाल एयरलाइन्समार्फत उद्धार गरिरहेको छ ।