अमेरिकाका राष्ट्रपति डोनल्ड ट्रम्पकी पत्नी मेलानिया ट्रम्पको स्लोभेनियास्थित सेभनिकामा राखिएको काठको मूर्तिमा आगो लगाइएको मूर्तिकारले बताएका छन् । 

अमेरिकाको स्वतन्त्रता दिवसको अवसरमा शनिवार मूर्तिमा आगो लगाइएको हो । 
 

बर्लिनमा बस्ने अमेरिकी कलाकार ब्राड डाउनीले पूर्णकदको सालिक बनाएको तर अहिले आगो लागेर त्यो कुरूप भएको बताए । यसको बारेमा खबर पाउनेबित्तिकै मूर्तिलाई हटाइएको उनले बताए । 

त्यो मूर्ति राखेको एक वर्ष मात्र भएको थियो । 

‘उनीहरूले किन यसो गरे जान्न चाहन्छु,’ डाउनीले भने । आफूले अमेरिकाको राजनीतिक परिस्थितिमाथि टिप्पणी गर्नका लागि यो मूर्ति बनाएको उनको भनाइ छ । मेलानिया आप्रवासी भए पनि आप्रवास घटाउने राष्ट्रपतिसँग

उनको विवाह भएको विषयलाई आफूले उजागर गर्न चाहेको उनले बताए । 
 

वाशिङटनमा मेलानिया ट्रम्पको कार्यालयले टिप्पणीका लागि गरेको अनुरोधमा तत्काल प्रतिक्रिया जनाएन ।

अमेरिकामा जातीय अन्यायका विरुद्ध राजनीतिक अभियान चलिरहेको बेलामा ऐतिहासिक धरोहररू विनाश गर्ने काम भइरहेको छ । पुराना मूर्ति भत्काउनेविरुद्ध कडा कारवाही गर्ने प्रतिज्ञा राष्ट्रपति ट्रम्पले गरेका छन् ।