भारतको बिहार राज्यमा रहेको बगहास्थित वाल्मीकि टाइगर रिजर्भको जंगलमा सुरक्षाकर्मीसँगको भिडन्तमा चारजना माओवादी मारिएका छन् ।

शुक्रवार घन्टौंसम्म भएको भिडन्तमा प्रहरीले चारजना नक्सल आतंकवादीहरूलाई मारेको हो । 
 

हरनाटांड जंगल क्षेत्रमा माओवादीहरू लुकेको सूचना पाएपछि एसटीएफ र एसएसबीको टोलीले संयुक्त कारवाही चलाएको थियो । भिडन्तमा एसटीएफका दुई जवान पनि घाइते भएका थिए । उनीहरूलाई अनुमण्डलीय ​अस्पतालमा उपचारका लागि भर्ना गरिएको छ । 

सुरक्षाकर्मीको टोलीले तीनवटा एसएलआर सहित चारवटा अत्याधुनिक हतियार पनि बरामद गरेको छ । पानी परेका कारण यस अपरेसनमा निकै बाधा पुगेको भए पनि नक्सलीहरूलाई मार्न सुरक्षाकर्मी सफल भए ।