काठमाडौं, ३० वैशाख– चुनावी सरगर्मीले राजनीतिक दललाईमात्र होइन आम सर्वसाधरणलाई पनि छपक्कै छोएको छ । उम्मेदवार, राजनीतिक दल र तीनका नेता कार्यकर्ता चुनावी तयारीलाई व्यापक बनाइरहेका छन् । मतदाता पनि भोट हाल्न उत्साहित छन् ।

यो चुनावी उत्सवले नेपाली कलाकारीतामा मिश्रित प्रभाव पारेको छ । कोही कलाकार चुनावी अभियानमा मज्जाले होमिएका छन् भने कसैलाई चुनावी प्रचारले फिल्म रिलिजलाई समेत ओझेलमा पारेको छ ।

निर्वाचनको मौन अवधिभन्दा अगाडि नायिका रेखा थापा चुनावी प्रचारमा व्यस्त थिइन् । सामाजिक सञ्जालमार्फत विभिन्न कलाकारले आफ्नो पक्षका पार्टीलाई भोट माग्ने कामलाई प्राथमिकतामा राखेको देखियो ।

तर, कोही फिल्मकर्मी भने चुनावमा को –को उठेका छन् भन्नेबारेमै अनभिज्ञ छन् ।

प्रेमगीत नायक प्रदीप खड्का यतिबेला चलचित्र ‘प्रेमगीत २’ को प्रचारमा व्यस्त छन् । साउन १३ गतेबाट प्रदर्शन हुन लागेको चलचित्रको प्रचारमा व्यस्त प्रदीपले आफूले कुन पार्टीमा भोट हाल्ने भन्नेबारेमा अहिलेसम्म कुनै योजना नबनाएको बताए । ‘भोट माग्न त आउनुभएको थियो । तर, मलाई राजनीतिबारे सोच्ने फुर्सद नै भएन । फिल्मको प्रचारमै व्यस्त छु,’ खड्का थप्छन्, ‘मेरो त भोट हाल्ने योजना पनि छैन । अन्तिम समयमा आएर सोच बन्न सक्छ ।’

कास्कीमा शुटिङ भइरहेको रामबाबु गुरुङ निर्देशित चलचित्र ‘मिस्टर झोले’ को छायांकनमा व्यस्त नायिका वर्षा राउतले चुनावमा भोट हाल्ने सम्भावना न्यून भएको बताइन् । पहिले भोट हालेर पनि केही नभएको बताउने वर्षाका लागि भोट भन्दा महत्वपूर्ण उनको फिल्मको शूटिङ भइरहेको छ ।

‘भोट नै नहाल्ने भन्ने त छैन । तर सम्भावना कम नै छ । फिल्मको शूटिङका लागि बाहिर छु । सम्भव भयो भने भोट हाल्छु ।’ मतादाता नामावलीमा नाम भएपनि कसलाई भोट हाल्ने भन्नेमा उनले पक्का मानसिकता बनाएकी छैनन् । ‘फेसबुकमा विवेकशील नेपालीको पोस्ट शेयर गरेका आधारमा मलाई सोही पार्टीकी भन्ने पनि गरिन्छ, तर म कुनै पार्टीमा पनि छैन,’ आफ्नो राजनीतिक संलग्नताका सम्बन्धमा चलेका चर्चाका बारे उनले प्रष्ट्याईन ।

वरिष्ठ हास्यकलाकार तथा लेखक हरिवंश आचार्यले २० वर्षपछि हुन लागेको चुनावलाई महत्वपूर्ण ठानेका छन् । स्थानीय सरकार नहुँदा नै दुई वर्षअघि भूकम्पले पारेको असर र पुनर्निर्माणको काममो ढिलाई भएको उनको ठहर छ । भक्तपुरको बालकोटबाट आफ्नो उम्मेदवार छान्ने आचार्यले चुनावी माहोल र उम्मेदवारलाई नजिकैबाट नियालेका छन् । ‘स्थानीय निर्वाचनमार्फत चुनिने उम्मेदवार स्थानीय अभिभावक नै हुन्,’ उनी सुनाउँछन् ।

चलचित्र ‘लप्पन छप्पन’ नायिका वर्षा शिवाकोटी आफूले परिवारको सल्लाहमा भोट हाल्ने बताइन् । सीतापाइलाकी स्थानीयवासी शिवाकोटीले पहिलेजस्तै लाइनमा बसेर भोट हाल्ने योजना बनाएको बताइन् । ‘हामी टोलमा कसलाई भोट हाल्ने भन्नेबारे छलफल पनि गर्छौं । चुनाव चाहिँ मज्जाले लागेको छ ।’ शिवाकोटी भन्छिन्, ‘चुनावले चलचित्र कारखानाको प्रचारलाई ओझेलमा पारेको छ । चुनावपछि हामी फिल्मको प्रमोसनमा जुट्नेछौं ।’

अब चुनाव सम्पन्न नहुन्जेलसमम राजनीतिमै होमिएका कलाकारले समेत प्रचार गर्न पाउने छैनन् । प्रायः कलाकारले आफूले कसलाई भोट हाल्ने भन्ने निर्णय लिइसकेका उनिहरूको भनाईबाट प्रश्ट हुन्छ ।

फिल्मकर्मी, कलाकार, संगीतकर्मी लगायतका सबै सेलिब्रेटीले चुनावलाई महत्वका साथ लिएका छन् । २० वर्षपछि हुने चुनावले देशको स्थितिले पनि बिस्तारै निकास पाउने आशा पलाएको कलाकारहरू बताउँछन् ।

---

---