कोभिड– १९ नाम दिइएको कोरोना महामारीले झण्डै एक वर्षसम्म शिथिल बनाएको अर्थतन्त्र र जनजीवन चलायमान बन्न शुरू गर्दै गर्दा नेपालमा कोरोनाको दोस्रो लहरको त्रास बढेको छ ।

कोरोना महामारीका कारण गत वर्षको चैत महिनादेखि बन्द रहेका विद्यालय लामो कालखण्डपछि केही साता अघिमात्र सुचारू भएका थिए । शनिवार फेरि सीसीएमसीले तीन साताका लागि विद्यालय बन्द गर्न मन्त्रिपरिषद्मा सिफारिश गरेको छ । 

विद्यालय बन्द गर्न सीसीएमसीले गरेको सिफारिसले मानिसहरूमा फेरि एक प्रकारको सन्त्रास बढेको छ । कोरोनका कारण लामो समय बन्द रहेको अर्थतन्त्र भर्खरै तंग्रिँदै थियो । 

उल्लेख्य विदेशी पर्यटक नआए पनि आन्तरिक पर्यटकले नेपालको पर्यटन क्षेत्रलाई केही हदसम्म भए पनि राहत दिँदै आएको थियो । 

फाट्ट–फुट्ट विदेशी पर्यटक आउन थालेपछि सुस्ताएको पर्यटन व्यवस्थाले श्वास फेर्न शुरू गरेको छ । 

कोरोनाको संक्रमणको दोस्रो लहर फैलिने खतराका बावजुद पर्याप्त सावधानी अपनाएको देखिएको छैन । कोरोना संक्रमण फैलाउन सबभन्दा जोखिमपूर्ण ठानिएको राजधानी काठमाडौं उपत्यकामा सार्वजनिक यातायातमा भीडभाड कायमै छ ।

रेष्टुराँ र चिया पसलमा पनि मानिसहरू विना मास्क भीडभाड गरेर बसेको देखिन्छ । भीडभाड हुने ठाउँमा भौतिक दूरी कायम गर्ने तथा मास्क लगाउने र हातधुने जस्ता सावधानी अपनाउने कुरालाई सरकारले कडाइ गर्न जरुरी छ । 

जनताको जीवन रक्षा सरकारको मुख्य दायित्व हो । साथसाथै देशको अर्थतन्त्रलाई चलायमान र बनाइराख्नु अनिवार्य शर्त हो । 

जनताको जीवन रक्षा गर्दै अर्थतन्त्रलाई चलायमान बनाइराख्नेतर्फ सरकारले ध्यान पुर्‍याउन जरुरी छ ।

फेरि पनि लकडाउन या ‘सेमी लकडाउन’जस्ता अर्थतन्त्रलाई धक्का दिने कुनै पनि कदम देशले धान्न सक्दैन ।

सावधानीका उपाय अवलम्बन गर्दै आम नागरिकलाई कोभिडविरुद्धको खोप छिटोभन्दा छिटो लगाउने प्रबन्ध गर्नेतर्फ सरकारको ध्यान केन्द्रित हुन जरुरी छ । 

नागरिकमा चेतना र पर्याप्त सावधानीबाट कोरोना संक्रमणको जोखिमलाई कम गर्न सकिन्छ ।

महामारीका बेला सरकारले गरेका आग्रहलाई नागरिकले अनुशरण गरे भने फेरि पनि लकडाउन गर्नुपर्ने आवश्यकता हुँदैन ।