पञ्चकन्या ग्रुप प्रायः सबै नेपालीले सुनेको वा चिनेको नाम हो । 

४८ वर्ष पहिले उद्यमी प्रेमबहादुर श्रेष्ठले शुरू गरेको यो ग्रुप ‘फ्यामिली बिजनेस’मा निकै अब्बल मानिन्छ ।

प्रेमबहादुरले शुरू गरेको यस ग्रुपमा ध्रुवबहादुर श्रेष्ठ, प्रदीपबहादुर श्रेष्ठ, बद्रीबहादुर श्रेष्ठ, उज्ज्वल श्रेष्ठ हुँदै नाति पुस्ताका उदीप श्रेष्ठ पनि संलग्न छन्  ।

हजुरबादेखि नातिपुस्तासम्मले हाँकिरहेको यो समूहले विभिन्न क्षेत्रमा सफल व्यावसायिक यात्रा गरिरहेको छ । 

प्रदीपबहादुर श्रेष्ठका छोरा उदीप ग्रुपका कान्छा कार्यकारी निर्देशक हुन् । 

नयाँ सोचका साथ अन्य औद्योगिक घरानाहरूसँग प्रतिस्पर्धा गर्ने जिम्मेवारी अहिले उदीपकै काँधमा छ । 

००००

उदीपको बाल्यकाल भारतमा बित्यो । 

भारतमै हुर्किएका उनले कक्षा १२ सम्म उतै अध्ययन गरे । 

वर्षमा ३ महिना (बिदाका समयमा) मात्रै उनी नेपाल आउँथे । 

स्कूलको अध्ययन सकाएपछि उनी पहिलोपटक लगातार एक वर्षसम्म नेपालमा बसे ।

व्यावसायिक घरानामा जन्मिएका उदीपले सानैदेखि व्यावसायका कुरा सुन्थे । 

रगतमा नै व्यवसाय भएका उदीप अहिले व्यवसायमा जमेका छन् । 

उनी भन्छन्, ‘परिवारमा व्यावसायिक छलफल हुने गथ्र्यो । शायद त्यही भएर होला यो क्षेत्रमा रुचि जागेको ।’

भारतमा कक्षा १२ सम्म अध्ययन गरेका उदीपले सिंगापुरबाट ब्याच्लर र मास्टर्स सकाए । 

ब्याच्लर सकाएपछि पनि केही समय उनी नेपालमै बसेका थिए । यो २०६५ तिरको कुरा हो । उदीपको व्यावसायिक यात्रा त्यहीँबाट शुरू भयो ।

व्यवस्थापन संकायमै स्नातक गरेका उनले सिंगापुरमा छँदा नै अब के गर्ने भन्ने सोचिरहेका थिए । तर त्यतिखेर सिंगापुरमा आर्थिक मन्दीले हाहाकार मच्चिएको थियो । 

उदीपलाई त्यो समय त्यहाँ बसिरहन उचित लागेन, र नेपाल फर्किए । 

‘कहिलेकाहीँ उतै सेटल हुँ जस्तो लाग्थ्यो, तर मनले मानेन,’ उनले भने ।

उदीपलाई पञ्चकन्या ग्रुपको विरासत अगाडि बढाउने दायित्वबोध हुँदै गएको थियो । 

‘कम्पनी र परिवारले हामीमाथि लगानी गरेको छ, त्यसकारण पनि हामीले परिवारलाई र कम्पनीलाई माथि लैजान केही योगदान गर्नुपर्छ भन्ने लाग्यो । त्यसपछि मैले यसमै लाग्ने निर्णय लिएँ,’ उनले भने ।

त्यसपछि उदीपले सामान्य तालिमहरू लिन थाले । 

आफ्नो व्यावसायिक ग्रुपको माहोल, बजार तथा अन्य क्षेत्र सबैको अध्ययन गरे । 

‘मलाई एकदमै फ्री छाडिएको थियो । यो डिभिजन हेर्नू, त्यो काम गर्नू भन्ने केही भएन । यी सब मेरा लागि एकदमै नयाँ कुरा थियो,’ उनले सम्झिए, ‘त्यसपछि मैले ट्रेनिङ लिएँ । नयाँ कम्पनी सेटअप गरें र यात्रा शुरू गरें ।’

सीफएलबाट शुरू भएको यात्रा 

२०६५/६६ तिर मुलुकमा निकै ‘लोडशेडिङ’ हुन्थ्यो । 

लोडशेडिङ अरूलाई समस्या बनेका बेला उदीपका लागि भने अवसर बनिदियो । 

उनले सीएफएल बत्तीको बिक्री शुरूआत गरे । 

उज्यालो बढी दिने तर ऊर्जा खपत कम गर्ने सीएफएल निकै लोकप्रिय बन्यो ।

‘ठीक समयमा ठीक निर्णय’ लिएका उनी डेब्यु बिजनेसमै सफल बने ।

समय बित्दै गयो । उनले नयाँ–नयाँ सोच अगाडि ल्याए ।

ट्रेडिङ बिजनेसमा उनले पाइला चाले । अहिले पञ्चकन्यामा ट्रेडिङ डिभिजन नै छ । 

यसमा पनि उनले केही नयाँ योगदान दिए । 

त्यसपछि उनले मोटरसाइकलको पनि बिक्री शुरू गरे । 

मोटरसाइकलमा डुकाटी प्रसिद्ध थियो ।  

डुकाटी तथा बेनेलीको मोटरसाइकलको बिक्री अहिले पनि जारी छ । 

उनले ब्याच्लर सकेर ग्रुपमा काम गर्दै गर्दा करीब साढे ३ वर्षसम्म समय दिए । 

त्यसपछि मास्टर्स अध्ययन गर्ने रहरले पुनः सिंगापुर पुगे । 

मास्टर्स सकेपछि भने उनले आफ्नो व्यावसायिक यात्रालाई थप विस्तार गरे । 

भूकम्प जानुअघि अर्थात् २०७१ को अन्तिमतिर उनी आफ्नो उच्च शिक्षा सकेर स्वदेश फर्किए । 

त्यसपछि उनको व्यावसायिक यात्राले बाटो समात्यो । 

२०७२ मा उदीप पुरानो विरासत ओगटेको पञ्चकन्या ग्रुपको कार्यकारी निर्देशक बने । 

पञ्चकन्या ग्रुपमा यात्रा थालेसँगै उदीपले हजुरबुवाको लिगेसीलाई मात्रै बोकेनन्, नयाँ–नयाँ क्षेत्रमा आफ्नो व्यापारिक यात्रा समेत अगाडि बढाए ।

००००

भूकम्प गएकै आसपासमा उनले कार्यकारी निर्देशकको जिम्मेवारी सम्हालेका थिए । 

त्यतिखेर पञ्चकन्या ग्रुपमा धेरै कामहरू सिस्टममा भएको थिएन । 

भूकम्पपछि उनले सिस्टम बसाले । साथै बजारबारे बढीभन्दा बढी जानकारी संकलन गरे ।

‘प्रोफेसनल हुनका लागि त्यही अनुसारको इन्फरमेसन हुनुपर्छ, हामीले त्यसपछि इन्फरमेसन लिने, बजारबारे थप जानकारीहरू संकलन गर्ने काम गर्‍यौँ,’ उनले भने ।

भूकम्पपछि पञ्चकन्या ग्रुपले ‘पीएसएस’ स्टील बजारमा ल्यायो । 

भूकम्पपछिको पूनर्निर्माणका लागि यो स्टीलको प्रयोग निकै भयो । 

उदीपले भने, ‘भूकम्पपछिको पूनर्निर्माणका लागि पीएसएस स्टीलको प्रयोग व्यापक भयो ।’

उनका अनुसार, भूकम्प गएको ४ महिनामा ग्रुपले यसको छुट्टै डिभिजन शुरू भयो । 

त्यतिखेर नै पीएसएस स्टील ४ सयभन्दा बढी घरहरूमा प्रयोग गरिएको थियो । 

त्यसपछि उदीप निर्माण कार्यलाई थप विस्तार गर्ने निष्कर्षमा पुगे । 

ग्रुपले निर्माण एजेन्टको पनि व्यवस्था गर्‍यो ।

पञ्चकन्या ग्रुपले भूकम्पपछि ट्यांकी पनि उल्लेख्य मात्रामा बेचेको छ । 

अहिले पञ्चकन्या ग्रुपमा सञ्चालनमा रहेका विभिन्न युनिटलाई अप्टिमाइजेसनको काम भइरहेको छ । 

उत्पादन क्षमता तथा गुणस्तरलाई प्राथमिकतामा राखेर काम भइरहेको छ ।

आफ्नै स्वामित्व

हजुरबुवाले शुरू गरेको व्यवसायलाई नै निरन्तरता दिइरहेका उदीपले नयाँ–नयाँ क्षेत्रमा हात हालेका छन्, जसमा उनी सफल पनि बन्दै गएका छन् । 

उदीपले आफ्नै सक्रियतामा भोल्भो गाडीको बिक्री शुरू गरे । 

यति मात्रै नभएर आफ्नो करिअरको शुरूआतमै डुकाटी तथा बेनेली मोटरसाइकलको बिक्री पनि उनले आफ्नै स्वामित्वमा अगाडि बढाइरहेका छन् । 

यस्तै ट्रेडिङ बिजनेसमा पनि उदीप अगाडि बढिरहेका छन् । 

अहिले पञ्चकन्या ग्रुपका कार्यकारी निर्देशक बनेका उदीपले ग्रुपलाई अगाडि बढाउनु त छँदैछ, आफ्नै स्वामित्वमा रहेका बिजनेसहरूलाई पनि अगाडि बढाइरहेका छन् । 

‘मुख्य कुरा समय व्यवस्थापन रहेछ । म बिहानैदेखि काममा फोकस हुन्छु । प्रायजसो फिल्डमै रहन्छु ।’

नयाँ उत्पादन बजारमा ल्याउने तयारी 

पञ्चकन्या ग्रुपले अहिले नयाँ उत्पादन बजारमा ल्याउने तयारी गरिरहेको छ । 

ग्रुपले विगत ४ वर्षदेखि नयाँ उत्पादन बजारमा ल्याएको थिएन । 

अब भने प्लास्टिक र स्टिल क्षेत्रमा नयाँ उत्पादन बजारमा ल्याउन लागिएको कार्यकारी निर्देशक श्रेष्ठ बताउँछन् ।

उनका अनुसार, निर्माण, स्टील्स, डन्डी तथा प्लास्टिकका केही नयाँ उत्पादन बजारमा ल्याउनका लागि अहिले काम भइरहेको छ । 

अबको केही महिनापछि नै ती उत्पादनहरूलाई बजारमा ल्याउने तयारी भइरहेको उनले बताए ।

युवा उद्यमीलाई प्रोत्साहन 

उदीप आफूले युवा उमेरमा नै व्यवसायमा हात हाले । 

अहिले उनी पञ्चकन्या ग्रुपमा मात्र सीमित छैनन् । 

उनले ‘स्टार्टअप उद्यमी’हरूलाई विभिन्न किसिमका सहजीकरणको काम पनि गरिरहेका छन् । 

उनी गत जेठदेखि नेपाली युवा उद्यमी मञ्चको अध्यक्ष बनेका छन् । 

उदीप भन्छन्, ‘सिकाइ नै मुख्य कुरा हो । मञ्चमा रहेर हामीले व्यावसायिक वातावरणबारे जानकारी दिइरहेका हुन्छौं ।’

युवा उद्यमीहरूलाई विभिन्न किसिमका सहयोग, प्रोत्साहन तथा सरकारको नीति बनाउने काममा समेत युवा उद्यमीमैत्री वातावरण बनाउन उनले पैरवी गर्दै आएका छन् ।