राष्ट्रियसभा सदस्य वामदेव गौतमले सरकार र राजनीतिक दलको गैर-जिम्मेवारीपनका कारण संघीय संसद्को उपसभामुख र उपाध्यक्षको पदपूर्ति हुन नसकेको बताएका छन् । 

मंगलवार राष्ट्रियसभाको विशेष समयमा बोल्दै गौतमले प्रतिनिधिसभाको उपसभामुख र राष्ट्रियसभाको रिक्त उपाध्यक्ष पदमा महिला चयन गर्न नसक्नु सरकार र राजनीतिक दलका लागि लाजमर्दो विषय भएको बताएका हुन् । ‘यदि पुरुष सदस्य पद रिक्त भएको खण्डमा दलहरुले तुरुन्तै पद पूर्ति गरिहाल्थे,’ उनले भने, ‘महिला नियुक्त गर्नुपर्ने भएकाले प्रतिनिधिसभामा ४ वर्ष र राष्ट्रियसभामा करिब ४ महिना यता पदपूर्ति हुन नसकेको छैन ।’ 

गौतमले संविधानको धारा ९२ मा राष्ट्रियसभाको अध्यक्ष र उपाध्यक्ष भन्ने व्यवस्था गरेको भन्दै उपाध्यक्ष बिनाको अध्यक्षको परिकल्पना गर्न नसकिने उल्लेख गरे । उनले दुईमध्ये कुनै एक पदमा महिला अनिवार्य हुने कुरा संविधानले नै उल्लेख गरेको भन्दै पुरुष नभए पनि हुने तर महिला अनिवार्य हुनुपर्ने दाबी गरे ।

उनले आफू संविधान निर्माता मध्येको एक भएकाले संविधानविपरीत भइरहेका गतिविधि सहन नसक्ने चेतावनी दिए । ‘म संविधान निर्माता पनि हो । मेरो हक हुन्छ कि, मैले निर्माण गरेको संविधानका हरेक विषयमा व्याख्या गर्ने अधिकार राख्छु,’ गौतमले भने । 

उनले अध्यक्ष र उपाध्यक्ष दुवै पदमा महिला हुँदा पनि संविधानको भावनालाई असर नगर्ने बताए । रिक्त पद पूर्तिका लागि सरकार, राजनीतिक दल र संसदले नै चासो नदेखाउनु दुःखद् भएको गौतमको भनाइ छ । 

गौतमले राष्ट्रियसभाका ४ समितिमध्ये ३ वटामा सभापति नरहेको उल्लेख गर्दै सरकार, राजनीतिक दल, राष्ट्रियसभाका अध्यक्ष र कार्यव्यवस्था समितिको ध्यानाकर्षण गराए । सरकार र राजनीतिक दलहरुको लापरबाहीविरुद्ध महिला सांसदहरूले आन्दोलन गर्नुपर्ने अवस्था आएको उनको भनाइ छ ।