​गृह मन्त्रालयले झण्डावाला र अत्यावश्यक सेवाका सरकारी गाडी सबै दिनमा निर्वाध चल्ने वातावरण बनाउन परिपत्र गरेको छ । प्रहरी प्रधान कार्यालय, मातहतका सबै प्रहरी कार्यालयहरू र सबै जिल्ला प्रशासन कार्यालयलाई गृहले सार्वजनिक विदाका दिनमा पनि त्यस्ता गाडी निर्वाध सञ्चालन हुने वातावरण मिलाउन भनेको हो । 

गृहले प्रहरी कार्यालयहरूलाई पठाएको परिपत्रमा झण्डावाला र अत्यावश्यक सेवाका सरकारी गाडीलाई सार्वजनिक विदामा दिनमा चलाउन पास आवश्यक नपर्ने स्पष्ट पारेको छ । परिपत्रमा झण्डावाला सवारी साधन, सुरक्षा निकायले प्रयोग गर्ने सवारी साधन, एम्बुलेन्स, दमकलजस्ता अत्यावश्यक सवारी साधनहरूलाई सार्वजनिक विदाको दिन चलाउन सवारी पास आवश्यक नपर्ने स्पष्ट पारिएको छ । 

पछिल्लो समय विदाका दिनमा चलाइएका सरकारी गाडी विभिन्न समूहले रोक्ने र पास खोज्ने गरेपछि गृहले प्रहरी कार्यालयहरूलाई परिपत्र गरेको हो । पछिल्लो समय धरानमा एक मन्त्रीको गाडी नै स्थानीयवासीले रोकेका थिए । 

मन्त्रालयले त्यसबारेमा सर्वसाधारणलाई समेत सुसूचित गर्न पनि भनेको छ । त्यस्तै, झण्डावाला, सुरक्षा निकाय र अत्यावश्यक बाहेकका सरकारी सवारी साधन विदाको दिन समेत चलाउनुपर्ने भएमा अनिवार्य सवारी पास लिनुपर्ने व्यवस्था कडाईका साथ लागू गर्न पनि गृहले भनेको छ ।