झरना साहित्यिक परिवार मकवानपुरको ३० औँ वार्षिकोत्सव एवम् २८७ औँ साहित्य शृङ्खलाको अवसरमा आयोजित दुई दिने बकैया कला–साहित्य महोत्सव सम्पन्न भएको छ । जनक माध्यमिक विद्यालय भीरकोटमा विविध साहित्यिक गतिविधिसाथ आयोजित सो कार्यक्रममा सम्पन्न भएको हो । 

बकैया गाउँपालिकाको आर्थिक व्यवस्थापनमा आयोजित महोत्सवको दोस्रो दिनका कार्यक्रममा स्रष्टा सम्मान, बकैया तथा बकैया बाहिरका विद्यार्थीको रचना वाचन, चित्रकला प्रदर्शनी, जिल्लाभित्र तथा जिल्लाबाहिर छानिएका सर्जकका गजल, कविता तथा मुक्तक वाचन, झरना पत्रिका विमोचन, समय सान्दर्भिक बहस तथा विविध लोक सांस्कृतिक प्रस्तुतिहरू समावेश गरिएको झरना साहित्यिक परिवार मकवानपुरका सचिव मसान उपासकले जानकारी गराए ।  

बकैया गाउँपालिकाका अध्यक्ष धर्मराज लामिछानेले स्थानीय स्तरमा देखिएका विविधखालका समस्याहरूको समाधान खोज्न साहित्यिक गतिविधिहरुले महत्वपूर्ण भूमिका खेल्ने बताए ।  त्यस्तै, गाउँपालिकाका उपाध्यक्ष भक्तबहादुर खत्रीले यस्ता कार्यक्रमहरुबाट गाउँपालिकाको गरिमा बढ्नुका साथै स्थानीय प्रतिभाहरूको विकास हुँदैजाने विश्वास व्यक्त गरे ।  

सम्मान तथा पुरस्कार वितरण समारोहमा प्राडा. जीवेन्द्रदेव गिरीलाई २१ हजार १२१ राशिसहितको होमनाथ–टीकामाया प्रतिभा सम्मान प्रदान गरिएको छ । यसैगरी मकवानपुरे पत्रकार भानुभक्त आचार्यलाई ११ हजार १११ राशिसहितको गोकर्ण गौतम स्मृति पत्रकारिता पुरस्कार प्रदान गरिएको छ ।

यस वर्षको खडानन्द–मनमाया प्रतिभा सम्मानबाट सिन्धुलीकी स्रस्टा अमला अधिकारी सम्मानित भइन् । त्यस्तै सुशीला दङ्गाल स्मृति सिर्जनशील नारी सम्मानबाट मकवापुरे स्रष्टा अनिता न्यौपाने सम्मानित भइन् । मकवापुर जिल्लामा साहित्य सेवा गरेबापत प्रदान गरिने सञ्जीवनी बुटी साहित्य सेवा पुरस्कार यस वर्ष बकैयाका कृष्णप्रसाद चौलागाईलाई प्रदान गरिएको छ । 

यसैगरी यस वर्षको खिमबहादुर खत्री स्मृति कलाकारिता सम्मानबाट ऋषि केबी सम्मानित भए । सम्मानको राशि जनही ७ हजार ७७७ रहेको छ । यसैगरी झरना साहित्यिक परिवार मकवानपुरद्वारा हरेक वर्ष प्रदान गरिने ५ हजार ५५५ राशिसहितको झरना बकैया नवप्रतिभा सम्मान यस वर्ष बकैयाकी कवि स्वस्तिका दाहाललाई प्रदान गरिएको छ । झरना–बकैया उत्कृष्ट विद्यालय सम्मान यस वर्ष पनि महेन्द्र मावि, छतिवनलाई प्रदान गरिएको छ । संस्थाद्वारा नै प्रदान गरिने झरना–बकैया सिर्जनशील शिक्षक सम्मान यस वर्ष प्रभात मावि, श्रीपुरका शिक्षक कुमार स्याङ्बोलाई प्रदान गरिएको छ ।