'माओवादी आन्दोलनका भंगालहरू एउटै प्रवाहमा मिसिन्छन्'

नेपाल समाजवादी पार्टीका अध्यक्ष डा. बाबुराम भट्टराईले माओवादी आन्दोलन फेरि एक ठाउँमा उभिनुपर्ने बताएका छन् ।

माओवादी आन्दोलनमा रहेका शक्तिहरू विभिन्न भंगालमा छरिए पनि अन्ततः नदीको एउटै प्रवाहमा मिसिनुपर्ने र मिसिने बताएका हुन् । 

‘भंगला छुट्छन्, तर अन्तिममा गएर मिल्छन्, इमानमा रह्यौं भने माओवादीहरू फेरि एक ठाउँमा पुग्न सक्छौं । केही समययता हाम्रो भंगलाहरु फाटेकै हुन् । यसलाई छोप्नुपर्ने केही छैन । अलग बाटोमा हिँड्दैमा गलत गर्‍यौँ र कोही दलाल नै भएको भन्ने हुँदैन । सोचहरू फरकफरक हुन सक्छन्’, शहीद तथा बेपत्ता योद्धा सन्तति फाउन्डेसनद्वारा आयोजित कार्यक्रममा उनले भने, ‘फरकफरक ठाउँमा छौं भने निष्ठावान् हुँदा एक ठाउँमा बस्न र हिँड्न सकिन्छ ।’

बाबुरामअघि प्रधानमन्त्री एवं माओवादी केन्द्रका अध्यक्ष पुष्पकमल दाहाल प्रचण्डले पनि माओवादी आन्दोलनका दलहरू एक ठाउँमा उभिने बताएका थिए ।

यसमा पनि डा. बाबुराम भट्टराईसँग आफ्नो धेरै विषयमा समान मत रहेकोले धेरै नजिकिएको बताएका थिए ।