नारायण रायमाझी निर्देशित फिल्म ‘परदेशी २’ असोज २६ गतेबाट प्रदर्शनमा आउने भएको छ । 

यसअघि कात्तिक ३ गतेलाई प्रदर्शन मिति तोकेको फिल्म घटस्थापनाको दुई दिन अघिबाटै प्रदर्शनमा आउने भएको हो । ​

फूलपातीलाई ‘परदेशी २’सँगै दीपेन्द्र के. खनाल निर्देशित फिल्म ‘पशुपति प्रसाद २ : भष्मे डन’ले प्रदर्शन मिति तोकेका थिए । दुवै फिल्मका निर्माताबीचको छलफलपश्चात फिल्महरू एक साताको अन्तरमा प्रदर्शनमा आउने सहमति जुटेको हो । 

फुटेर होइन, जुटेर अगाडि बढ्नुपर्छ भन्ने कुरालाई आत्मसाथ गर्दै ‘परदेशी २’ एक हप्ता अगाडि सरेको हो । ‘पशुपति प्रसाद २ : भष्मे डन’ भने कात्तिक ४ गते फूलपातीको दिनबाट प्रदर्शनमा आउनेछ । ​

रमेश बिजीको कथा रहेको ‘परदेशी २’मा प्रकाश सपूत, केकी अधिकारी, वर्षा सिवाकोटी, दीलिप रायमाझी, प्रशान्त तामाङ, नीर शाह, रमा थपलिया, सुशील पोखरेल, सविन बास्तोला, भीमा मैनाली, देवेन्द्र बब्लु, रोशनी कार्कीलगायतको अभिनय छ । गायक प्रकाशले यही फिल्मबाट अभिनेताको रुपमा डेब्यू गरेका हुन् । फिल्मको निर्मातामा राजेश बंशल र निर्देशक रायमाझी रहेका छन् । युवापुस्ताको विदेश मोहको कथा फिल्मले वाचन गर्छ । 

यता, ‘पशुपति प्रसाद २ : भष्मे डन’मा विपिन कार्की, सौगात मल्ल, स्वस्तिमा खड्का, वर्षा शिवाकोटी, रवीन्द्र सिंह बानिया लगायतको अभिनय छ । खगेन्द्र लामिछाने फिल्मका लेखक एवं निर्देशक हुन् । 

यी दुवै फिल्म दर्शकमाझ प्रतीक्षित मानिएका छन् ।