कलाकार शिशिर भण्डारीले आफ्नो हिट गीत ‘फोटो फिरिममा’ शीर्षकमा टेलिसिरियल ल्याउने भएका छन् । 

निर्माणको तयारी सुरु भइसकेको टेलिसिरियलमा उनकै कथा, पटकथा एवं संवाद लेखन रहनेछ । 

उनले कथा लेखनको काम सुरु गरिसकेका छन् । कलाकार छनौटको काम पनि सुरु भइसकेको उनले जानकारी दिएका छन् । ‘केही नव कलाकारहरूसँगै केही नाम चलेका कलाकारहरू समावेश गरेर सिरियल निर्माण हुँदैछ’ भण्डारीले भने, ‘मेहनतका साथ पारिवारिक र सामाजिक परिवेशमा मनछुने सिरियल निर्माण गर्ने हाम्रो जमर्को रहनेछ ।’

माघको पहिलो साताबाट प्रसारणमा ल्याउने तयारी रहेको सिरियललाई सन्तोष राजबाहकले निर्देशन गर्नेछन् । 

 रेडियो र टेलिभिजनमा प्रस्तोता हुँदै करिअर अगाडि बढाएका भण्डारीले केही चलचित्रमा अभिनय गरेका छन् । थुप्रै गीत सिर्जना गरेका उनले मोडलिङ गरेका म्युजिक भिडियोहरू पनि रुचाइएका छन् । 

जसमध्ये ‘फोटो फिरिममा’ उनको सिर्जना र अभिनय रहेको चर्चित गीत हो । अहिलेकी सर्वाधिक चर्चितमध्येकी गायिका रचना रिमालको स्वरमा झन्डै चार वर्षअघि सार्वजनिक गीतलाई स्रोता दर्शकले निकै रुचाएका थिए ।

गीतको चाइल्ड भर्सन समेत सार्वजनिक भइसकेको छ ।