इजरायलमा प्यालेस्टाइनी आतंकवादी समूह हमासको आक्रमणमा परी घाइते भएका एक नेपालीको कारुणिक भिडियो बाहिर आएको छ ।

घाइते अवस्थामा देखिएका ती नेपालीले आफ्नो मृत्यु भएमा आमाको औषधोपचार गरिदिन भनेर आग्रह गरेका छन् ।

नौ सेकेन्ड लामो भिडियोमा उनले अँध्यारो कोठाबाट सन्देश प्रवाह गरेको देखिन्छ । भिडियोमा उनले भनेका छन्, 'म इजरायलमा मरें भने मेरो घरमा आमाको औषधि गर्दिनू है दाइ तपाईंले ।'

'उनी सुदूरपश्चिमबाट यहाँ आएका विद्यार्थी हुन्,' लोकान्तरलाई भिडियो समेत उपलब्ध गराउँदै तेलअभिवमा रहेका रमेश जोशीले भने, 'उनले यो भिडियो इजरायलको गाजापट्टी क्षेत्रबाट मलाई पठाएका हुन् ।' 

प्रवासी नेपाली मञ्च इजरायलका सचिव समेत रहेका उनले बिहानैदेखि इजरायल अशान्त रहेको बताए ।

पुरानो राजधानी तेलअभिवमा मिसाइल डोम प्रहार भएको छ, तर डोम भूइँमा झरेको छैन । इजरायलको एन्टी डोम प्रतिरक्षा प्रणालीले ती डोमलाई रोकिरहेको छ ।

'मिसाइल आक्रमण भएलगतै यहाँ साइरन बज्छ, हामी दौडिँदै बंकरमा छिर्छौं, त्यसरी आक्रमण हुँदा पूरै धर्ती हल्लिन्छ,' उनले भने ।

यता हमासले हवाई आक्रमणसंगै स्थल आक्रमणलाई पनि उत्तिकै प्राथमिकता दिएको छ, जसका कारण इजरायल र प्यालेस्टाइनको विवादित क्षेत्र गाजापट्टीमा धेरैले ज्यान गुमाएका छन् । ठूलो संख्यामा नागरिक अंगभंग भएको इजरायली समाचार संस्थाहरूले बताएका छन् । 

स्थलमार्गबाट आएका आक्रमणकारीको आक्रमणमा ९ नेपाली विद्यार्थी घाइते भएको र २ को अवस्था गम्भीर रहेको परराष्ट्र मन्त्रालयले जनाएको छ ।

सुदूरपश्चिमको कैलाली घर भएका जोशीले अगाडि भने, 'मैले धेरै दाजुभाइलाई सम्पर्कको कोशिश गरें, कतिजना त अहिले सम्पर्कमै आएका छैनन्, कतिले आफ्नो कठिनाइको भिडियो सन्देश पठाएका छन् ।'

गाजापट्टीको नेगेभ क्षेत्रको नितिवोदमा गाई, कुखुरा, तरकारी उत्पादन हुने अलमिन किबुज फार्ममा काम गर्ने १७ नेपाली अहिले सम्पर्कमा नआएको जोशीको भनाइ छ ।

नेपाली दूतावासमा पनि जानकारी गराएको र दूतावासका पदाधिकारीहरू पनि निस्किने अवस्थामा नरहेको जानकारी पाएको जोशीले बताए ।

उनका अनुसार सो क्षेत्रमा सुदूरपश्चिम विश्व विद्यालयका ४९ जना विद्यार्थी सेदोत नेगेभ एग्रिकल्चर सेन्टरमार्फत पढाइ र काम गर्दै आएका छन् ।