‘दिमाग खराब’ले उठाएको मागमा चलचित्र संघ र निर्माता संघको वार्ता आज पनि जारी

नेपाल चलचित्र संघ र निर्माता संघबीचको वार्ता बिहीवार पनि जारी छ ।​ मंगलवार र बुधवार चलेको वार्ता बिहीवार पनि यथावत रहेको हो ।​ 

बिहीवार भने दुई पक्षबीच सहमति जुटाउने सम्भावना बलियो रहेको निर्माता संघका वार्ता टोली संयोजक अशोक शर्माले बताए ।

‘वार्ता सकारात्मक भएको छ । साँझसम्म टुंगो लाग्ने सम्भावना देखिन्छ’ शर्माले भने । 

चलचित्र संघका उपाध्यक्ष एवं वार्ता टोलीका सदस्य गोपालकाजी कायस्थले पनि बिहीवार सहमति जुट्ने सम्भावना रहेको बताए । 

वार्तामा सहभागी एक सदस्यका अनुसार निर्माताले चलचित्र प्रदर्शनभर ५० प्रतिशत शेयर पाउनुपर्ने मुद्दामा सहमति जुट्ने सम्भावना बलियो छ । 

दर्शक बढिरहँदा पनि शोज कटौती भएपछि शोज र शेयर बाँडफाँडमा आपत्ति जनाउँदै ‘दिमाग खराब’को प्रदर्शन रोक्ने चेतावनी यसको निर्माण पक्षले दिएको थियो । त्यसपछि चलचित्रले हिन्दी चलचित्रसरह शोज पाएको थियो ।

शेयर बाँडफाँडको विषयमा भने टुंगो लागेको थिएन् । ‘दिमाग खराब’ भोलि शुक्रवारबाट तेस्रो सातामा प्रवेश गर्दैछ । 

यद्यपि, वार्ता नटुंगिएकाले शुक्रवारका लागि चलचित्रको शोज सार्वजनिक गरिएको छैन ।