पल शाह चलचित्र ‘मायाका रंगहरु’मा अनुबन्धित

अभिनेता पल शाह चलचित्र ‘मायाका रंगहरु’ (कलर्स अफ लभ)मा अनुबन्धित भएका छन् । यो चलचित्र केवल तामाङको निर्माण तथा डेब्यु निर्देशनमा बन्न लागेको हो । 

‘मायावी’ चलचित्रको छायांकन सकेका पलले ‘पूजार सार्की’को छायांकनपछि ‘मायाका रंगहरु’मा काम गर्नेछन् । भारतको सिक्किमबाट चलचित्रको छायांकन सुरु गरिने जनाइएको छ । 

प्रमिस इन्टरटेन्मेन्टको ब्यानरमा निर्माण हुने चलचित्रको ९० प्रतिशत छायांकन सिक्किम र बाँकी दार्जिलिङ, इलाम र काठमाडौंमा गरिने छ । भद्र भुजेल र राम मेहरा मुख्य सहायक निर्देशक रहने चलचित्रमा सौरभ लामाको डिओपी, शेखर ज्ञवालीको कथा, तारा प्रकाश लिम्बु, उर्गेन दोङ र दीपक शर्माको संगीत, सुष्मा सोनम र रामजी लामिछानेको कोरियोग्राफी रहनेछ । 

चलचित्रको हेड अफ प्रोडक्सन तथा लाइन प्रोड्युसरमा सिक्किमबाट टीकाराम अधिकारी, दार्जिलिङबाट सुवास क्षेत्री र नेपालबाट पदम तामाङ रहनेछन् । चलचित्रमा ६० प्रतिशत फिल्मकर्मी भारत र ४० प्रतिशत फिल्मकर्मी नेपालबाट लिने तयारी निर्माण टिमको छ । 

नेपाली र हिन्दी भाषामा निर्माण गरिने चलचित्रमा पल शाहबाहेक अन्य कलाकारहरू छनोटको चरणमा रहेको निर्माण टिमले जानकारी दिएको छ । चलचित्रले नेपाल र भारतको पर्यटन प्रवर्द्धनमा टेवा पुग्नुका साथै नेपाल र भारतबीच सांस्कृतिक सम्बन्धलाई अझै बलियो बनाउन सहयोगी भूमिका खेल्ने विश्वास निर्देशक तामाङको छ ।