गत वैशाखमा अभिनेता दयाहाङ राईका दुईवटा फिल्म एकैदिनबाट प्रदर्शनमा आए । उनको शीर्ष भूमिका रहेको फिल्म ‘जारी’ र ‘बिहे पास’ वैशाख १ मा प्रदर्शनमा आएका थिए । यीमध्ये ‘जारी’ले राम्रो व्यापार गर्यो । 

यो वर्ष फेरि दयाहाङका दुई फिल्म भिड्ने भएका छन् । माघ २६ गते उनी अभिनीत दुईवटा फिल्मको प्रदर्शन तय छ । सिमोस सुनुवारको निर्देशन रहेको ‘हात्तीछाप’ र माओत्से गुरुङको निर्देशन रहेको फिल्म ‘दयारानी’ एकैदिनबाट प्रदर्शनमा आउने भएका हुन् । 

यी दुवै फिल्ममा दयाहाङ शीर्ष भूमिकामा छन् । किरण नेपाली प्रस्तुतकर्ता रहेको ‘हात्तीछाप’मा दयाहाङका साथमा सौगात मल्ल, विल्सन विक्रम राई, उपासना सिंह ठकुरी, बेनिशा हमाल, बुद्धि तामाङ, विजय बराल लगायतको अभिनय छ । 

यस्तै, ‘दयारानी’मा दयाहाङ र दीया पुन शीर्ष भूमिकामा छन् । साथमा विजय बराल, प्रमिश गुरुङ, श्रीशा कुवँर, नयन गुरुङ, पुश्कर गुरुङ लगायतको अभिनय छ । अभिनेता माओत्से गुरुङले यही फिल्मबाट निर्देशनमा डेब्यु गरेका हुन् । 

एउटै मितिमा दुई फिल्मले प्रदर्शन मिति तय गरेपछि दयाहाङमाथि प्रचारप्रसारमा भने दबाब पर्ने देखिएको छ । दयाहाङ अहिलेका सर्वाधिक व्यस्त र खोजिने अभिनेता हुन् ।