बुटवलको कालिकानगरमा चारखुट्टे हाइटेन्सन पोल हटाइँदै, मोनोपोल राख्ने तयारी

​​बुटवलको कालिकापथको सडकमा रहेका हाइटेन्सन लाइनका ठूला पोल हटाएर साना र सुरक्षित मोनोपोल राख्ने प्रक्रिया शुरू भएको छ ।

फराकिलो सडकका बीचमा रहेका पुराना चार खुट्टे पोललाई विस्थापित गरी एक खुट्टे (टावर मोनोपोल) राखिन लागेको हो । त्यसको लागि आइतवारदेखि माटो परीक्षणको काम शुरू भएको छ ।​​

मोनोपोल चारखुट्टे जस्तो भद्दा संरचना पनि देखिँदैन । होराइजन चोकदेखि तलतिर सडकमा रहेका चार वटा ‘रिप्लेस’ गरिने नेपाल विद्युत प्राधिकरण योगीकुटी शाखाका इन्जिनियर इन्जिनियर सूर्य पाण्डेले बताए ।

अति जोखिमपूर्ण रहेको यो सडकमा रहेका पोलहरूलाई नयाँ राख्नको लागि यस क्षेत्रबाट निर्वाचित प्रतिनिधिसभा सदस्य तथा पूर्व अर्थमन्त्री विष्णु पौडेलले पहल गरेका थिए ।

‘फराकिलो सडकका बीचमा रहेका चारखुट्टे हाइटेन्सनका पोलले दुर्घटनाको जोखिम समेत बढाएको छ । अब सानो मोनोपोल राखेपछि दुर्घटनामा कमी आउनुका साथै सुरक्षित पनि बढी हुन्छ । त्यसको लागि हामीलाई स्थानीयको साथ आवश्यक छ’, इन्जिनियर पाण्डेले भने, ‘२५ दिनभित्र ड्रिल गरेर स्वाइल टेस्ट गरिसकेपछि कस्तो आकारको पोल आवश्यक हुन्छ, त्यहीँअनुसार कम्पनीलाई निर्माण गर्न दिन्छौं ।’​

गर्मी अघि नै काम सक्ने गरी अघि बढेको उनले बताए ।​​​

योगीकुटीदेखि मगरघाट हुँदै मैनाहिया जाने खण्डमा भूमिगत प्रशारण लाइन विस्तारको काम पनि अघि बढेको छ ।

‘चार वटा खुट्टा भएको जिग्राउँदो पोल हेर्दा पनि त्यति राम्रो देखिँदैन’, एमाले उपाध्यक्षसमेत रहेका पौडेलले भने, ‘अहिले नयाँ प्रविधिका मोनोपोल विकास भएको छ । एउटा ठिङ्ग उभिने पोल हो । यसले सडकलाई साँघुरो पनि पार्दैन हेर्दा नराम्रो पनि हुँदैन । त्यो व्यवस्था अनुसार यो काम अघि बढाएका थियौं, त्यहीँअनुसार काम अघि बढेको हो ।’  

अहिलेको प्रशारण लाइनको पोलले सडकको धेरै भाग ओगटेको देख्दा भद्दा र बेलाबेला दुर्घटनाको समेत जोखिम बढेकोले मोनोपोल राख्न लागिएको हो ।

यो पोल राखिएपछि कालिकापथ थप आकर्षक र सुरक्षित हुनेछ ।​  विकसित देशहरूमा यस्ता मोनोपोल बढी प्रयोग भइरहेका छन् ।

नेपालमा एक दुई ठाउँलाई सुरक्षित बनाउन मोनोपोल राख्न थालिएको हो ।