रूपन्देही व्यापार संघको अधिवेशन: एमाले निकटकै दुई प्यानल प्रतिस्पर्धामा

रुपन्देही व्यापार संघको नयाँ नेतृत्वका लागि दुई प्यानल प्रतिस्पर्धामा उत्रिएका छन् । नेकपा एमालेनिकट  व्यवसायीको बाहुल्य रहेको संघमा दुवै प्यानल एमाले निकट हुन् । संघको २२औं साधारणसभा तथा १२औं अधिवेशनले नयाँ नेतृत्व चयन गर्दैछ ।

नयाँ नेतृत्वका लागि वरिष्ठ उपाध्यक्ष डिल्लीराज भण्डारी र द्वितीय उपाध्यक्ष दीपक अधिकारीले प्यानलसहित उम्मेदवारी दर्ता गरेका छन् । भण्डारी संघको कार्यसमिति सदस्य भएयता सचिव, महासचिव हुँदै वरिष्ठ उपाध्यक्ष भएर काम गरेका छन् । अधिकारी कार्यसमिति सदस्य, कोषाध्यक्ष, उपाध्यक्ष हुँदै प्रथम उपाध्यक्ष भएर काम गरेका छन् ।

तर, पार्टी निकटकै व्यवसायी दुई प्यानलमा विभाजित भएपछि पार्टी जिल्ला नेतृत्वलाई टाउको दुखाइ बनेको छ । संघको वरिष्ठ उपाध्यक्षमा प्रकाश ढकाल र महासचिवमा फर्सुराम पन्तको एकल उम्मेदवारी परेपछि उनीहरू निर्विरोध भएका छन् ।

प्रथम उपाध्यक्षमा भण्डारीको प्यानलबाट दयानिधि भण्डारी र अधिकारीको प्यानलबाट ऋषिराम पाण्डे उम्मेदवार छन् । द्वितीय उपाध्यक्षमा भण्डारीको प्यानलबाट नामदेव पाण्डे र अधिकारीको प्यानलबाट प्रेमनाथ पाण्डे, कोषाध्यक्षमा भण्डारीको प्यानलबाट झविन्द्र अधिकारी र अधिकारीको प्यानलबाट मनिराम खनाल उम्मेदवार छन् ।

सचिवमा भण्डारीको प्यानलबाट मनहरी बस्याल र अधिकारीको प्यानलबाट मनिमदिन मिया, सहसचिवमा भण्डारीको प्यानलबाट प्रकाशराज पौडेल तथा अधिकारीको प्यानलबाट मेघनाथ पौडेल तथा सहकोषाध्यक्षमा भण्डारीको प्यानलबाट विनित भट्टराई र अधिकारीको प्यानलबाट अर्जुनप्रसाद भट्टराईको उम्मेदवारी परेको छ ।

अध्यक्षका उम्मेदवार अधिकारीले आफू नेतृत्वमा आएपछि संघलाई गतिशील र व्यावसायिक संस्था बनाउँदै सबै व्यवसायीको हकहितमा काम गर्ने बताए ।

व्यावसायिक संघ संस्थाहरू परम्परागत ढंगले नचल्ने हुँदा संघको नेतृत्वमा युवा पंक्ति आवश्यक भएको उनको भनाइ छ । भण्डारीले आफूले संघमा हालसम्म गरेको मेहनत र योगदानलाई व्यवसायीले बुझेको भन्दै नेतृत्वमा आउने बताए ।

‘सबै व्यवसायीहरूले संघमा कसले महत्वपूर्ण योगदान गरेको छ भन्ने बुझेका छन्, मेरो नेतृत्वको टिमले सहजै विजय हासिल गर्छ,’ भण्डारीले भने । संघमा एक हजार ५०० भन्दा बढी व्यवसायी सदस्य छन् ।

साधारणसभाको उद्घाटन नेकपा एमालेका सचिव तथा रुपन्देही क्षेत्र नम्बर १ का प्रतिनिधिसभा सदस्य छविलाल विश्वकर्माले उद्घाटन गर्ने कार्यक्रम छ । साधारणसभा सकिएलगतै दिउँसो १ बजेदेखि मतदान सुरु हुने निर्वाचन समितिले जानकारी दिएको छ ।