विष्णुकुमारीको राजनीतिक यात्राः स्थानीय तहमा चोट, राष्ट्रियसभामा बलियो भोट

गुल्मेली महिला नेतृ विष्णुकुमारी सापकोटाले संसद्को माथिल्लो सदन राष्ट्रियसभाको यात्रा तय गरेकी छिन् । बिहीवार सम्पन्न राष्ट्रियसभा निर्वाचनमा सापकोटा ५ हजार ४३५ र मतभार सहित विजयी भइन् । सापकोटा गुल्मीमा नेपाली कांग्रेसभित्र बौद्धिक र क्षमतावानको पहिचान बनाएकी छिन् । पार्टीमा लामो रस्साकस्सीपछि उनलाई राष्ट्रियसभा उम्मेदवार बनाएको थियो । गुटको किचलोका कारण सत्ता गठबन्धनको ठूलो दल कांग्रेसलाई उम्मेदवार छान्न निकै सकस भएकै बेला सापकोटा राष्ट्रियसभा सदस्यका लागि उम्मेदवार बनेपछि पार्टीका नेता कार्यकर्ता र गुल्मेलीमा खुसीयाली छाएको थियो । 

सरल जीवनशैली अपनाउन रुभाउने सापकोटा विस २०२३ असार १० गते मुसिकोट नगरपालिका–८ मा जन्मिएकी हुन् । सबैसँग मिल्न सक्ने नेतृत्वको रुपमा आफ्नो छवि बनाएकी सापकोटाले शारदा विद्या मन्दिर माविमै कक्षा ४–५ मा पढ्दैबाट जुनियर रेडक्रस सर्कलहरूमा आवद्ध भएर नेतृत्वको विकास गरेकी थिइन् ।

सापकोटाले महेन्द्र आदर्श माविबाट नेपाल विद्यार्थी संघमा आवद्ध भएर औपचारिक रुपमा विद्यार्थी राजनीति शुरू गरेकी हुन् । यसपछि उनी पद्म कन्या क्याम्पसमा नेविसंघ सदस्य, पाटन संयुक्त क्याम्पसको इकाई समापति हुँदै २०५५ सालमा सोही क्याम्पसकीे स्वतन्त्र विद्यार्थी युनियन (स्ववियु) सदस्यमा निर्वाचित भइन् । 

त्यस्तै सापकोटा २०५८ सालमा नेविसंघको छात्रा विभागअन्तर्गत केन्द्रीय सदस्य भएको केही समयपछि गृहजिल्लाको राजनीतिमा फर्किन् । ०६३ देखि ०७४ सम्म महिला संघको सभापति बनिन् । उनी ०७४ सालमै नेपाली कांग्रेसको १३ महाधिवेशनमा जिल्ला कार्यसमिति सचिव बनेकी थिइन् । सापकोटा १४ औं महाधिवेशनबाट अहिले कांग्रेस लुम्बिनी प्रदेशको कार्यसम्पादन समिति सदस्य रहेकी छिन् । 

सापकोटा ०७४ सालको स्थानीय तहको निर्वाचनमा मुसिकोट नगरपालिकामा उपप्रमुखको उम्मेदवारसमेत रहेकी थिइन् । नेकपा (एमाले)की महिला नेतृ कमला शर्मासँगको प्रतिस्प्रर्धामा उनी पराजित भएकी थिइन् । स्थानीय तहको चोटलाई भुलाउने गरी संसद्को माथिल्लो सदनमा पुगेपछि उनलाई गुल्मीमा बधाई दिनेको ओइरो लागेको छ । राजनीतिबाहेक सामाजिक कर्महरूमा समेत सक्रिय सापकोटाले आफूलाई पार्टीले दिएको अवसरलाई राष्ट्रियहितमा उपयोग गर्ने बताइन् । 

पार्टीमा आफूले अवसरभन्दा पनि प्रजातन्त्र र लोकतन्त्रको पक्षमा काम रहेको बताउँदै सापकोटाले राष्ट्रियसभामा पनि सोही अनुसारको भूमिका निर्वाह गर्ने प्रतिबद्धता व्यक्त गरिन् । ‘मेरो खुसी नै सबै नेता–कार्यकर्ताको खुसी हो । मलाई अवसर दिने नेतृत्वप्रति आभारी छु,’ उनले भनिन्, ‘राष्ट्रिय नेता बनेर राष्ट्र एवं प्रजातन्त्र र लोकतन्त्रको पक्षमा काम गर्ने प्रण गर्दछु ।’