उपप्रधान तथा गृहमन्त्री रवि लामिछानेले एउटा ठाडो उजुरीलाई लिएर नेपाली कांग्रेसले सदन अवरुद्ध गरेको भन्दै आपत्ति जनाएका छन् । 

शनिवार काठमाडौंमा आयोजित एक कार्यक्रममा बोल्दै गृहमन्त्री लामिछानेले आफूलाई सदनमा बोल्न नदिएकोमा समेत आपत्ति जनाए ।

'म चुनौतीका साथ भन्न चाहन्छु, त्यो एउटा ठाडो उजुरीलाई लिएर सदन नै अवरुद्ध गर्न खोज्नुभएको छ', उनले भने, 'म उहाँहरूलाई भन्न चाहन्छु – तपाईं कहाँ कहिले कुन मितिमा मलाई बोलाउनुहुन्छ ?'

उनले सदनमा आफ्नो कुरा राख्न नपाएको भन्दै जनताको माझमा खुला बहस गर्न कांग्रेसलाई चेतावनी दिए । 

'मैले आफ्ना कुरा राख्न पाएको छैन । ठीक छ, जनताको माझमा खुला रुपमा बहस गरौं । तपाईंले भनेको ठाउँ र मितिमा बोलाउनुस् र प्रमाणित गरिदिनुस्, तपाईं भएभरका सबै लिएर र प्रभावशाली नेताहरु बोकेर आउनुहोला । सबै प्रमाणहरू लिएर आउनुहोला', म एक्लै आउँछु,' उनले भने ।

उनले सहकारीको विषयमा अदालतमा मुद्दा गएको र अदालतले नै हेर्ने जिकिर गरे । अदालतले हेरेपछि मात्र सदनमा कुरा आउनुपर्ने लामिछानेको भनाइ छ । 

'जुन मुद्दामा बहस चलेको छ, त्यो सबै प्रमाण बोकेर आओस् । मलाई प्रमाणित गरिदिए हुन्छ, तत्काल के गर्नुपर्ने त्यहीबाट गरौंला', उनले भने, 'यति भन्दिनुस्, म कहाँ आऊँ बहस गर्न । एक्लै हरेक जिज्ञासाको जवाफसहित समाधान दिन्छु । यो बहस अझै काठमाडौं ४ मा भयो भने मलाई सहज हुन्थ्यो ।'

राजीनामा झोलामा छ, काम गर्न नसके कांग्रेसलाई जस्तो गलहत्याउन पर्दैन– गृहमन्त्री लामिछाने