यसै वर्ष हुने युरोकप फूटबल प्रतियोगिताको प्रमुख दाबेदार मानिएको इंग्ल्यान्ड अन्तर्राष्ट्रिय मैत्रीपूर्ण खेलमा घरेलु मैदानमै ब्राजिलसँग स्तब्ध बनेको छ ।

शनिवार राति लन्डनस्थित वेम्बली रंगशालामा भएको खेलमा इंग्ल्यान्डले पाहुना टोली ब्राजिललाई १–० गोल अन्तरको नतिजा सुम्पिएको हो ।

ब्राजिलको जीतमा प्रतिस्थापन खेलाडी इन्डरिकले गोल गरेका हुन् । उनले ८० औँ मिनेटमा गरेको गोल नै निर्णायक बनेको हो । ब्राजिलका लागि इन्डरिकको यो पहिलो गोल हो ।

यता कप्तान ह्यारी केनबिना नै मैदानमा उत्रिएको इंग्ल्यान्ड भने १७ खेलपछि घरेलु मैदानमा पराजित भएको हो । 

यससँगै अधिकांश फूटबल पण्डितहरूको नजरमा युरोकपको प्रमुख दाबेदार रहेको इंग्ल्यान्डको सो प्रतियोगिता तयारीमा धक्का लागेको छ ।

जर्मनीमा हुने युरोकप जुन १४ मा शुरू हुँदैछ ।

यता ब्राजिलले भने चार खेलको जीतविहीन यात्रा टुंग्याएको हो । ब्राजिल पनि यसै वर्ष अमेरिकामा हुने कोपा अमेरिकाको तयारीमा छ । 

शनिवार राति नै भएको अर्को अन्तर्राष्ट्रिय मैत्रीपूर्ण खेलमा जर्मनीले फ्रान्सलाई उसको घरेलु मैदानमै हराएको छ ।

लियोनमा शनिवार राति भएको खेलमा जर्मनीले घरेलु टोली फ्रान्समाथि २–० गोल अन्तरको जीत निकालेको हो ।

जर्मनीले फ्रान्सलाई उसको घरमै हरायो