अन्तर्राष्ट्रिय मैत्रीपूर्ण खेलमा क्रिस्टियानो रोनाल्डोसहितको पोर्चुगल स्लोभेनियासँग पराजित भएको छ ।

मंगलवार राति स्टोजिस रंगशालामा  भएको खेलमा पोर्चुगल घरेलु टोली स्लोभेनियासँग २–० गोल अन्तरले पराजित भएको हो ।

स्लोभेनियालाई जीत दिलाउन एडम नेज्दा सेरिन र टिमी म्याक्स एल्सनेकले गोल गरे । 

सेरिनको गोलमार्फत ७२औं मिनेटमा स्लोभेनियाले अग्रता लिएको थियो । त्यसको ८ मिनेटपछि एल्सनेकले गोल गर्दै टोलीलाई २–० को जीत दिलाए ।

यो हारसँगै पोर्चुगलको ११ खेलसम्मको अपराजित यात्रामा पूर्णविराम लागेको छ ।  पोर्चुगल पछिल्लो पटक फिफा विश्वकप २०२२ मा मोरोक्कोसँग १–० ले पराजित भएको थियो ।

अघिल्लो खेलमा कप्तान रोनाल्डोबिनाको पोर्चुगल स्विडेनमाथि ५–२ ले हाबी भएको थियो । रोनाल्डो फर्किएको खेलमा भने पोर्चुगल तुलनात्मक सानो टोलीसँग नमज्जाले पराजित हुन पुगेको छ ।

यद्यपि स्लोभेनियासँगको खेलमा बर्नार्डो सिल्भा, ब्रुनो फर्नान्डेसजस्ता स्टार खेलाडी सहभागी थिएनन् ।