पोल्यान्डका प्रधानमन्त्री डोनाल्ड टस्कले युरोप 'युद्धभन्दा ठीक अगाडि' रहेको र सम्पूर्ण महादेशको भलाइका लागि कुनै पनि हालतमा युक्रेनविरुद्ध रूसलाई जित्न दिन नहुने' चेतावनी दिएका छन् । उनले भने, 'युद्ध अब विगतको कुरा रहेन । यो यथार्थ हो र यो हाम्रो अगाडि छ । यो दुई वर्ष पहिले शुरू भएको हो ।'

बिहीबार रुसले युक्रेनको ऊर्जा केन्द्रमा ठूलो हमला गरेपछि डोनाल्ड टस्कको बयान आएको थियो । त्यसअघि रुसी राष्ट्रपति भ्लादिमिर पुटिनले भनेका थिए कि 'नेटो देशहरूप्रति रूसको कुनै आक्रामक नियत छैन ।' यद्यपि पुटिनले युक्रेनले एफ-१६ लडाकु विमानहरूका लागि अन्य देशको हवाई स्ट्रिपहरू प्रयोग गरे 'उनीहरू जहाँ भए पनि वैध लक्ष्य बनाइने' चेतावनी दिएका थिए । 

युक्रेनमा भएको पछिल्लो हमलामा रुसले करिब १०० मिसाइल र ड्रोन प्रयोग गरेको थियो जसका कारण देशको ठूलो भूभाग अन्धकारमा डुबेको थियो ।

युक्रेनलाई आपतकालीन सैन्य सहायताका लागि अपील गर्दै पोल्याण्डका प्रधानमन्त्री टस्कले यो युद्ध अझै चर्किए अर्को दुई वर्षको युद्धले भविष्यको फैसला गर्ने चेतावनी दिएका छन् । 'हामी दोस्रो विश्वयुद्धको अन्त्यपछिको सबैभन्दा कठिन समयमा बाँचिरहेका छौं,' उनले भने । सन् २०२२ को फेब्रुअरीमा रुसले युक्रेनविरुद्ध युद्ध सुरु गरेपछि पश्चिमा देशहरूसँगको सम्बन्ध दोस्रो विश्वयुद्धपछिकै खराब अवस्थामा पुगेको छ ।

युरोपको सुरक्षाप्रति चिन्ता व्यक्त गर्दै उनले पहिलो पटक रुसले दिउँसो हाइपरसोनिक मिसाइलले किभमा आक्रमण गरेको बताए ।

२०२३ को अन्त्यमा प्रधानमन्त्रीको कार्यालयमा पुगेपछि युरोपेली मिडियासँगको आफ्नो पहिलो अन्तर्वार्तामा टस्कले अन्य युरोपेली नेताहरूलाई आफ्नो सुरक्षा बलियो बनाउन अपील गरेका थिए । 'युरोपले नेटोको समानान्तर संरचना बनाउन आवश्यक छैन तर, यदि महादेशले आफ्नै सैन्य क्षमताहरू विकास गर्‍यो भने यो अमेरिकाको मनपर्ने साझेदार हुनेछ ।'

पोल्याण्डले आफ्नो जीडीपीको चार प्रतिशत रक्षामा खर्च गर्छ, जबकि अन्य युरोपेली देशहरूले नाटोको दुई प्रतिशत लक्ष्य पनि पूरा गर्दैनन् ।

युरोपेली परिषद्का पूर्वअध्यक्ष टस्कले युरोपले युद्धअघि तयार हुनुपर्ने चेतावनी दिएका छन् । टस्क सन् २००७ देखि २०१४ सम्म पहिलो पटक पोल्याण्डको प्रधानमन्त्री बनेका थिए । उनले भने कि उनी प्रधानमन्त्री हुँदा पोल्याण्ड र बाल्टिक देशहरूबाहेक धेरै कम युरोपेली नेताहरूले रुसलाई सम्भावित खतराको रूपमा बुझेका थिए । युरोपभर फैलिएको यो मानसिकताबारे टस्कले युद्ध एक वास्तविकता बनेको छ जसलाई नकार्न नहुने बताए । बीबीसी