‘७० करोडको त कुनै डकुमेन्ट प्रमाण थिएन, सहकारी ठगीमा ८० करोडको हिसाब खोज्नु पर्दैन ?’

नेपाली कांग्रेसका महामन्त्री विश्वप्रकाश शर्माले टेलिफोनमा ७० करोडको कुरा गरेकै भरमा तत्कालीन मन्त्रीले राजीनामा गरेको प्रसंग कोट्याउँदै सहकारीको ८० करोड हिनामिना गरेको प्रमाण आउँदासमेत गृहमन्त्री रवि लामिछाने उम्किन खोजेको टिप्पणी गरेका छन् ।

बुधवारको प्रतिनिधि सभा बैठकमा महामन्त्री शर्माले ८० करोडको हिसाब देश दुनियाँले खोज्नु पर्ने बताएका हुन् ।

‘प्रश्न ८० करोड रुपैयाँ गोरखा मिडियामा गएको  रकमको हो । ८० करोडभन्दा कसैले ७० करोड सम्झेको होला । ७० करोड त केवल कसैले टेलिफोनमा बोल्दै गर्दा आएको कुरा थियो, डकुमेन्टमा थिएन, दर्ता थिएन, प्रमाण थिएन । फोनमा बोलेको आधारमा राजीनामा गर्ने मन्त्रीजी सांसद यही बसिरहनु भएको छ’, महामन्त्री शर्माले भने, ‘म राजीनामा माग्न उभिएको छैन । ८० करोड र तत्कालीन ७० करोडबीचको हिसाब देश दुनियाँले खोज्नुपर्छ कि पर्दैन ? ८० करोडका सन्दर्भमा राजीनामा होइन– संसदीय छानबिनको माग गर्न चाहन्छु ।’ 

कांग्रेस महामन्त्री शर्माले संसदीय छानबिन समिति बनाएर सहकारी ठगीको आरोप लागेका गृहमन्त्री रवि लामिछानेलाई निर्दोष हुने अवसर दिन आग्रह गरे ।