नेकपा (एकीकृत समाजवादी )का सम्मानित नेता झलनाथ खनालले फिल्म ‘महाजात्रा’हेरेका छन् । चुनावी कार्यक्रममा इलाममा व्यस्त नेता खनाल काठमाडौं आइपुग्नेवितिकै फिल्म हेर्न सिभिल मलमा रहेको क्युएफएक्स सिनेमाजमा पुगेका थिए । 

आइतबार बेलुकी आयोजित विशेष शो हेरेपछि नेता खनालले फिल्मले भ्रष्टचारी नेतालाई गतिलो मुक्का प्रहार गरेको बताए । ‘नेपाली जनताले अपेक्षा गरेकोजस्तै फिल्म बनेको पाएँ । नेपाली समाजमा जुन प्रकारको भ्रष्टचार, तस्करी देखिएको छ र त्यसलाई नेताहरूले संरक्षण गरेका छन्, त्यसको कारण देशमा युवा रित्तिएका छन् । यसले त्यस्ता गलत आशय राख्ने नेताको भण्डाफोर गरेको छ’, नेता खनालले भने,‘यो फिल्ममा अभिनेता हरिवंश आचार्यले आफ्नो पात्रमार्फत् क्रान्ति नै गर्नुभएको छ । नेताहरू नसच्चिएसम्म देश बन्दैन्, यस्तो क्रान्ति पर्दा बाहिर पनि चाहिएको छ ।’

उनले फिल्म हेरिरहँदा भरपुर मनोरञ्जनसँगै संदेशसमेत ग्रहण गर्न पाएको बताए । ‘फिल्ममा अभिनय गर्ने सबै कलाकारले कुशल कलाकारिता प्रदर्शन गर्नुभएको छ । पर्दामा देखिने पात्र जीवन्त छन् । म यो फिल्मलाई दश नम्बरमा ९.९ दिन्छु, यसले हाँसो मजाकमै गम्भीर विषयलाई उठान गरेको छ’, नेता खनालले भने ।

उनले फिल्म हेरिसकेपछि निर्माण पक्षसँगै कलाकारलाई भेटेर बधाई दिदै आगामी दिनमा समेत यस्तै फिल्म ल्याउन आग्रह गरे ।