इलाम २ को प्रतिनिधिसभा क्षेत्रमा भएको उपनिर्वाचनको जारी मतगणनामा १९ उम्मेदवारमध्ये १३ जनाले एक सय भोट पनि कटाउन सकेका छैनन् । 

कुल २१ हजार ८१० मत सदर हुँदा राप्रपा, राप्रपा नेपाल, जनमत, नेमकिपासहित अन्य ९ स्वतन्त्र उम्मेदवारले एक सय मत पनि नकटाएका हुन् । 

जनमतका प्रेमकुमार थाम्सुहाङले ५४, राप्रपाका लक्ष्मी गुरुङले ४६, नेमकिपाका श्यामबहादुर दर्जीले ११ र राप्रपा नेपालका गणेशबहादुर चौहानले १५ र नेपाली जनता दलका रेशमबहादुर सुनारले ५२ मत ल्याएका हुन् । 

त्यस्तै, राष्ट्रिय मुक्ति आन्दोलन, नेपालका जयवन्त विक्रम शाहले १५ मत प्राप्त गरेका छन् । 

स्ववतन्त्र उम्मेदवार अर्जुनबहादुर शाहीले १९, दीपेश बोहराले १८, राज बस्यालले ८, धनराज रानामगर, मनोज निरौला, योगेन्द्र गुरुङले २÷२ मत प्राप्त गरेका छन् । महिला चुनाव चिन्ह लिएर लडेका  स्वतन्त्र​ उम्मेदवारडाकप्रसाद गौतमले अझै मतको खाता खोल्न सकेका छैनन् । 

एक लाख १५ हजार ८८९ मतदाता रहेको इलाम २ मा शनिवार भएको उपनिर्वाचनमा ६९ हजार २८७ मत खसेको थियो । जारी मतगणनामा एमालेका सुहाङ नेम्वाङ ३०५९ मतले अग्रतामा छन् । उनले १० हजार ३ मत ल्याउँदा कांग्रेसका डम्बरबहादुर खड्काले ६ हजार ९४४ मत प्राप्त गरेका छन् । डकेन्द्रसिंह थेगिम लिम्बूले ६ हजार ५९१ मत प्राप्त गरेका छन् । रास्वपाका मिलन लिम्बूले १ हजार ४०१ मत ल्याएका छन् । 

एकीकृत समाजवादीका जीतबहादुर राईले २४०, मंगोल नेसनल अर्गनाइजेसनका मनिबहादुर लिम्बूले १८४ मत पाएका छन् ।