जनता समाजवादी पार्टी (जसपा) नेपाल विभाजनको नेतृत्व गरेका मोहम्मद इस्तियाक राईले उपेन्द्र यादवको तानाशाहीविरुद्ध विद्रोह गरेको बताएका छन् ।

विद्रोही समूहले ७ सांसद र कार्यकारिणी समितिका ८ सदस्यसहित आइतवार निर्वाचन आयोगमा दल दर्ताको निवेदन दिएका छन् । 

नयाँ दल निर्वाचनका लागि निवेदन लिएर आयोग पुगेका नेता राईले दल विभाजन भए पनि सरकारलाई समर्थन रहने बताएका हुन् ।

‘उपेन्द्र यादवको तानाशाही र अधिनायकवादविरुद्ध विद्रोह भएको हो, पुष्पकमल दाहाल 'प्रचण्ड' नेतृत्वको सरकारलाई दिएको समर्थन कायम रहन्छ’, राईले लोकान्तरसँग भने । 

वरिष्ठ नेता अशोक राईको नेतृत्वमा नयाँ दल दर्ताका लागि सरकारका बहालवाला मन्त्री नवलकिशोर साह सुडिसहितका ७ सांसद निर्वाचन आयोग पुगेका थिए । राईले कार्यकारिणी समिति र केन्द्रीय समितिमा पनि आफ्नो बहुमत रहेको दावी गरे । 

कार्यकारिणी सदस्य अशोक राई, राजेन्द्र श्रेष्ठ, रेणु यादव, नवलकिशोर साह सुडी, रणध्वज कन्दन्वा, सुशीला श्रेष्ठ, परशुराम बस्नेत र इस्तियाक राईसहितका कार्यकारिणी सदस्य आयोग पुगेका थिए । 

पार्टी विभाजनको समयमा उपप्रधानमन्त्रीसमेत रहेका उपेन्द्र यादव विदेश भ्रमणमा छन् ।

पार्टी विभाजनका लागि केन्द्रीय समिति र संसदीय दलमा ४० प्रतिशत पुर्‍याउनु पर्छ । जसपामा ५ सय ४ जना केन्द्रीय सदस्य छन् । आइतवार आयोगमा २८ जना केन्द्रीय सदस्य उपस्थित थिए ।

प्रतिनिधि सभामा १२ जना सांसद रहेको जसपा विभाजनले औपचारिक मान्यता पाए उपेन्द्र यादवसँग ५ जना सांसद बाँकी रहने छन् ।