नेपाली सेनाको आयोजनामा रक्षा संवाददाता अभिमुखीकरण कार्यक्रम शुरू भएको छ ।

पश्चिम पृतना हेडक्वार्टर विजयपुर ब्यारेक, पोखरामा मंगलवारबाट शुरू भएको कार्यक्रममा पश्चिम पृतनाको जिम्मेवारी क्षेत्र अन्तर्गतका जिल्लामा रहेका विभिन्न सञ्चार माध्यममा आबद्ध २५ जना सञ्चारकर्मीहरूको सहभागितामा रहेको छ ।

कार्यक्रमको शुभारम्भ गर्दै पश्चिम पृतनाका पृतनापति उपरथी सन्तोषबल्लभ पौड्‍यालले सूचित हुन पाउने जनताको अधिकारको संरक्षण समानान्तर रुपमा गर्न आवश्यक रहेको बताए ।

फरक विशेषता भएको सैनिक संगठन र सञ्चार जगतको समन्वय विन्दुको पहिचान गरी राष्ट्रिय सुरक्षा प्रवर्द्धन गर्नुपर्ने उनले बताए ।

४ दिनसम्म सञ्चालन हुने अभिमुखीकरण कार्यक्रममा नेपाली सेनाको सङ्गठनात्मक स्वरूप, जिम्मेवारी तथा भूमिका एवं मुख्य गतिविधिहरूको बारेमा जानकारीमूलक प्रस्तुतीकरण तथा अन्तरक्रिया हुनेछ ।

कार्यक्रममा जनसम्पर्क तथा सूचना निर्देशक सहायक रथी गौरवकुमार केसीलगायत अधिकृतहरूको उपस्थिति थियो ।