पत्रकारको प्रश्नले 'अवाक' बने एमबाप्पे !

फ्रेन्च क्लब पेरिस सेन्ट जर्मेन (पीएसजी) मात्र नभएर त्यसका स्टार केलियन एमबाप्पेको च्याम्पियन्स लिग फूटबल प्रतियोगिताको उपाधि जित्ने सपना तुहिएको छ । मंगलबार राति जर्मन क्लब बोरुसिया डर्टमन्डसँग पराजित भएपछि पीएसजी र एमबाप्पे दुवैको सपना चकनाचुर भएको हो ।

 पीएसजीविरुद्ध दोस्रो लेगमा १–० र समग्रमा २–० को जीत हासिल गर्दै डर्टमुन्ड ११ वर्षपछि च्याम्पियन्स लिगको फाइनलमा प्रवेश गरेको छ ।

च्याम्पियन्स लिगको पहिलो उपाधि जित्ने लक्ष्यमा रहेका एमबाप्पे मंगलबार राति निराश देखिएका थिए । त्यसमा पनि पत्रकारका प्रश्नले उनलाई झनै हैरानी दियो । एक रिपोर्टरले सोधे– अब दोस्रो सेमिफाइनलमा रियल म्याड्रिड र बायर्न म्युनिखमध्ये कुनलाई समर्थन गर्नुहुन्छ ? 

यस प्रश्नको एमबाप्पेले उत्तर दिन सकेनन् । अवाक बनेर उनी त्यहाँबाट हिँडे । 

विश्वकप जितेपनि एमबाप्पेले क्लब फूटबलको सबैभन्दा ठूलो प्रतियोगिता च्याम्पियन्स लिग जित्न सकेका छैनन् । उनी आबद्ध क्लब पीएसजीको पनि उस्तै अवस्था छ ।  

अब रियल र बायर्नबीचको दोस्रो सेमिफाइनल खेल आज राति हुँदैछ । यसको विजेताले डर्टमुन्डसँग उपाधिका लागि खेल्नेछ ।