विराटनगर, १८ फागुन– एक नम्बर प्रदेशका अति विशिष्ट ब्यक्तिहरुको उपस्थिती । पूर्वेली गीतको सुमधुर ध्वनी , लामबद्ध विशिष्ट ब्यक्तिहरुको अग्रपंक्तिमा सवैलाई अविर लगाउनका लागि अविर हातमा लिएर बसेका प्रदेश प्रमुख गोविन्दबहादुर तुम्वाहाङ । कार्यक्रमलाई औपतारिकता दिन खोजेको जस्तो देखिएपनि अगाडि ब्यानर राख्ने बाहेकका कुनैपनि औपचारिक कार्यक्रम थिएन । 

प्रदेश प्रमुखले आयोजना गरेको होलीको कार्यक्रममा राजाको हातबाट टिकाग्रहण गर्नको लागि लाम लागेर आशिर्वाद लिन जानेहरुको लर्कोजस्तै भान भएको थियो । 

फागु पूर्णिमाको शुभकामना दिन तथा एक आपसमा खुसी साटासाट गर्नको लागि प्रदेश प्रमुखको कार्यालयले यसरी शुभकामना आदान प्रदान तथा चियापान कार्यक्रमको आयोजना गरेको हो । 

प्रदेश प्रमुखको जिम्मेवारी सम्हालेर आएपछि पहिलो औपचारिक निम्तो गरेर मनाईएको पर्ब होलीको कार्यक्रमले राज्यको मससुस गर्न पाएको सहभागीले प्रतिक्रिया दिए । 
 

राजसंस्थाको झल्को !

राजसंस्थाको अन्त्य पछि देशमा ठूला राजनीतिक परिवर्तन भएका छन् ।  देशमा २ पटक संविधान सभाको निर्वाचन भयो । संविधान सभाबाट संविधान जारी भयो । राजाको ठाउँमा राष्ट्रपति आए । यहीबीचमा मधेश आन्दोलन भयो, धेरैले ज्यान पनि गुमाए । तर केही महिना अघिसम्म पनि यसरी प्रदेश प्रमुख आउने, प्रदेश कार्यान्वयनमा जाला भनेर सर्बसाधारणमा विस्वासै थिए । सरकारले प्रतिनिधि सभा र प्रदेश सभाको निर्वाचनसँगै संघियता पूर्ण रुपमा कार्यान्वयन भयो । हरेक प्रदेशमा प्रदेश प्रमुख र मुख्यमन्त्री सहितको प्रदेश सरकार बनेको छ । 

प्रदेशमा केन्द्रको जस्तै कार्यक्रमको आयोजनाले सरकार आफ्नो गाउँ ठाउँमा आएको महशुस भएको कार्यक्रममा सहभागीहरुले बताएका छन् ।

प्राध्यापक डाक्टर उत्तम कुमार रेग्मीले भने, राष्ट्रपति कार्यालयको झल्को दिने गरि कार्यक्रम भएको देख्दा सरकार आफ्नै गाउँमा आएजस्तै लाग्यो । १२ बजे देखि आयोजना गरिएको कार्यक्रमलाई ब्यवस्थित पारिएको थियो ।’

होलीको अवसरमा शुभकामना आदान प्रदान कार्यक्रमको आयोजना भईरहँदा सर्बसाधारणको उपस्थिति थियो भने विशिष्ट व्यक्तिहरुलाई निमन्त्रणा गरिएको थियो । 

कार्यक्रममा सभामुख प्रदीप भण्डारी, आन्तरिक मामिलामन्त्री हिक्मत कार्की, सांसद मोती दुगडलगायत  उद्योगी, व्यापारी, प्राध्यापक, राजनीतिक दलका प्रतिनिधि, सुरक्षा निकायका प्रमुख तथा प्रतिनिधि, समाजसेवी, बुद्धिजीवी, पत्रकारलगायतको उपस्थिति रहेको थियो । उनीहरुले एकआपसमा रंग दलेर शुभकामना आदानप्रदान गरे ।