क्यानले भन्यो- 'आईसीसीको प्रतिबन्ध फुकुवा हुन्छ भने हदैसम्मको लचकता अपनाउन तयार छौं'

काठमाडौं, ४ वैशाख-नेपाल क्रिकेट संघ (क्यान) ले अन्तर्राष्ट्रिय क्रिकेट परिषद् (आईसीसी) ले लगाएको प्रतिबन्ध फुकुवा हुने अवस्थामा आफूहरू जस्तोसुकै लचकता अपनाउन पनि तयार रहेको जनाएको छ ।

यही वैशाख ६/७ गते विशेष साधारणसभा गर्न लागेको क्यानले मंगलबार राजधानीमा पत्रकार सम्मेलन गरी आईसीसीले लगाएको प्रतिबन्ध फुकुवा हुने अवस्थामा हदैसम्मको लचकता अपनाउन तयार रहेको जनाएको हो ।

'प्रतिबन्ध फुकुवा हुन्छ भने हामी जस्तोसुकै लचकता अपनाउन पनि तयार छौं भनेर अाईसीसीलाई भनेका छौं, उहाँहरुले पनि विधिवत ढंगले विधान संशोधनसहित सबै प्रक्रिया पूरा हुन्छ भने प्रतिबन्ध फुकुवा हुन्छ भनेपछि नै यो प्रक्रियामा अघि बढेका हौं,' क्यानका महासचिव अशोकनाथ प्याकुरेलले भने ।

साथै उनले विधान संशोधनको विषयलाई पनि एड्भाइजरी कमिटीले तयार पारेको मस्यौदाअनुसार नै इमान्दारितापूर्वक विशेष साधारणसभामा लैजाने बताए । 'हामीले इमान्दारितापूर्वकै नै सबै विषयलाई एजीएममा लैजान्छौं, एजीएमलाई कन्भिन्स गर्न पनि प्रयास गर्छौं,' प्याकुरेलले भने ।

अन्य विभिन्न विवादित विषयलाई मनिटरिङ कमिटीले हेर्ने उनको भनाइ थियो । '५ सदस्यीय मनिटरिङ कमिटी बन्दैछ, त्यसमा आईसीसीका ३, राष्ट्रिय खेलकुद परिषद्का १ र क्यानका १ प्रतिनिधि रहनेछन्, जिल्लाको निर्वाचनसहित अन्य विवादित विषयलाई यही कमिटीले हेर्छ,' उनले भने ।

हाल क्यानको केन्द्रीय कमिटीमा रहेका १७ जना नै साधारणसभामा सहभागी हुन पाउने तर मतदान वा निर्वाचनमा भाग लिने हो भने तलैबाट आउनुपर्ने कुरामा पनि सहमति भइसकेको उनले बताए ।

बिहीबार र शुक्रबार बानेश्वरस्थित इन्द्रेणी फूडल्याण्डमा हुने विशेष साधारणसभामा आईसीसीका प्रतिनिधि पनि सहभागी हुने प्याकुरेलले जानकारी दिए । सहभागी हुने प्रतिनिधिको नाम भने आधिकारिकरूपमा प्राप्त भइनसकेको उनले बताए ।

साधारणसभाका लागि आईसीसीले नै बजेट उपलब्ध गराएको उनले जानकारी दिए । 'हामीले एकदमै न्यूनतम बजेट तयार पारेर आईसीसीलाई बुझाएका थियौं, त्यो बजेट उहाँहरूले उपलब्ध गराउनुहुने भएको छ,' प्याकुरेलले भने, 'बजेट करीब ७ लाख जतिको छ ।'

आईसीसीले क्यानमाथि लगाएको प्रतिबन्ध फुकुवा गर्न एड्भाइजरी कमिटीले संशोधनसहित तयार पारेको विधान जस्ताको तस्तै पारित गर्न दबाब दिँदै आएको छ ।

पत्रकार सम्मेलनमा क्यानका अध्यक्ष चतुरबहादुर चन्द भने उपस्थित थिएनन् । उनी पारिवारिक कामले राजधानीबाहिर रहेको महासचिव प्याकुरेलले जानकारी दिए ।