काठमाडौं – एक वर्षअघि सबैलाई चकित पार्दै क्याटलान जाइन्ट बार्सिलोनामा अनुबन्धित भएका ब्राजिलियन स्टार पउलिन्हो पुन: चीन फर्किएका छन् ।

उनी एकवर्षे लोनमा आफ्नो पूरानो क्लब ग्वान्झाओ इभरग्रान्डी फर्किएका हुन् । चाइनिज टोलीसँग पउलिन्होलाई खरिद गर्ने विकल्प पनि छ ।

पउलिन्हो गतवर्ष ४० मिलियनमा बार्सिलोना गएका थिए । त्यतिबेला समर्थकहरूले क्लब व्यवस्थापनको चर्को आलोचना गरेका थिए ।

बार्सामा एक सिजन रहँदा पउलिन्होको प्रदर्शन सम्झनलायक रह्यो ।

बार्सिलोनाले आफ्नो अफिसियल फेसबुक पेजबाट पउलिन्होलाई धन्यवाद दिएको छ भने ग्वान्झाओले स्वागत गरेको  छ ।

बार्सिलोनाले पउलिन्होको ठाउँमा ब्राजिलियन युवा खेलाडी अर्थुर मेलोलाई भित्र्याउने तयारी गरेको छ ।