काठमाडौं — अमेरिकाले आतंकवादी संगठन अलकायदाका नेता ओसामा बिन लादेनका छोरा हमजा बिन लादेनका बारेमा सूचना दिने व्यक्तिलाई १० लाख डलर (१२ करोड रुपैयाँ) पुरस्कार दिने घोषणा गरेको छ । 

अमेरिकाको गृह मन्त्रालयले हमजा अलकायदाका प्रमुख नेताका रूपमा उदाएको बतायो । 

हालैका वर्षमा हमजाले अनेकौं भिडियो सार्वजनिक गरेर उनको पितालाई मार्ने अमेरिका र उसका पश्चिमी सहयोगीसँग बदला लिनका लागि समर्थकहरूलाई एकताबद्ध हुन भनेका छन् । 

अमेरिकाको विशेष सैन्य बल सीलले सन् २०११ मा पाकिस्तानको एबोटाबादमा ओसामालाई मारेको थियो । 

हमजाको उमेर ३० वर्ष भएको बताइएको छ । अमेरिकाले उनलाई यसअघि नै वैश्विक आतंकवादी घोषणा गरिसकेको छ । 

हमजाले मोहम्मद अताकी छोरीसँग विवाह गरेका छन् । मोहम्मद अताले सन् २००१ मा अमेरिकामा भएको आक्रमणमा चार व्यापारिक विमानमध्ये एक विमान अपहरण गरेका थिए र न्युयोर्कस्थित वर्ल्ड ट्रेड सेन्टरमा आक्रमण गरेको थियो । 

एबोटाबादमा ओसामा बिन लादेनको घरमा भेटिएका चिट्ठीमा हमजालाई भविष्यका लागि तयार पारिएको थाहा भयो । हमजालाई ओसामाको सबभन्दा प्रिय छोरा मानिन्छ र उनले नै पिताको स्थान लिने बताइन्छ । 

अमेरिकाको गृह मन्त्रालयमा कार्यरत कूटनीतिक सुरक्षाका असिस्टेन्ट सेक्रेटरी माइकल इभेनअफले भने, ‘उनी अफगानिस्तान र पाकिस्तानको सीमामा हुन सक्छन । तर उनी दक्षिण केन्द्रीय एसियामा पनि हुन सक्छन् ।’

हमजाले इरानमा आफ्नी आमासँग अनेकौं वर्ष बिताएको मानिन्छ । त्यहीँ नै उनको बिहे पनि भएको हो । 

उनी पाकिस्तान, अफगानिस्तान वा सिरियामा हुन सक्ने रिपोर्ट पनि छन् ।

बीबीसी हिन्दीबाट