दुबई -गैरआवासीय नेपाली संघ युएई(एनआरएनए)का अध्यक्ष रमेश श्रेष्ठलाई दुबई प्रहरीले पक्राउ गरेको छ । शुक्रवार बिहान  ५ बजे अध्यक्ष श्रेष्ठलाई दुबई प्रहरीद्धारा पक्राउ गरिएको हो ।

अध्यक्ष श्रेष्ठलाई 'ड्रिङ एण्ड ड्राइभ'को केशमा पक्राउ गरिएको हो । सँगै गाडीमा एनआरएनए केन्द्रीय अध्यक्ष भवन भट्ट र अर्का केन्द्रीय उपाध्यक्ष कुल आचार्य सवार थिए । भट्ट र आचार्यलाई भने दुबई प्रहरीले साधारण सोधपुछ पछि छाडेका थिए । श्रेष्ठ पक्राउ परेपछि भट्ट र आचार्य ट्याक्सी मार्फत आफू बसेको होटलमा आएका थिए ।

'श्रमिकहरुको श्रम सीप र ज्ञानको विकास, सामुहिक लगानी समृद्धिको निकास' गरौँ भन्ने मुल नाराको साथ एनआरएनए युएईले आयोजना गरेको अन्तरक्रिया कार्यक्रममा सहभागी हुन युएई आइपुगेका एनआरएनए केन्द्रीय अध्यक्ष भट्ट र उपाध्यक्ष आचार्य कार्यक्रम सकिएपछि एनआरएनए युएई अध्यक्ष रमेश श्रेष्ठसँग देरा दुबई स्थित कार्लन टावरमा पुगेका थिए ।

उक्त होटलमा पर्वत सेवा समाजले आयोजना गर्न लागेको सांस्कृतिक कार्यक्रमको तयारीमा रहेका श्रेष्ठ निकट व्यक्तिहरुसँग भेटघाटको लागि पुगेका थिए । भेटघाटपछि त्यहाँ केही व्यक्तिहरुसँग श्रेष्ठको विवाद समेत भएको स्रोतले बताएको छ । विवादपछि दुबई श्रेष्ठलाई 'सिआइडी'ले फलोअप गरिरहेको थियो ।