सामान्य सोधपुछका लागि मात्र बोलाइएको हो - अध्यक्ष श्रेष्ठ

दुबई -गैरआवासीय नेपाली संघ (एनआरएनए) युएईका अध्यक्ष रमेश श्रेष्ठले आफूलाई दुबई प्रहरीले सामान्य सोधपुछका लागि मात्र बोलाएको दावी गरेका छन् । एक विज्ञप्ति जारी गर्दै श्रेष्ठले प्रवासी नेपालीहरूको हकहीतका लागि काम गर्ने समाजसेवीलाई दुबई प्रहरीले सोधपुछ गर्नु सामान्य भएको उल्लेख गरेका हुन् ।

'शुक्रवार बिहान मलाई प्रहरीले सामान्य सोधपुछका लागि बोलाएको हो,' श्रेष्ठले भने, 'सोधपुछका क्रममा मैले मेरो तर्फबाट आवश्यक सहयोग गरेर फर्केको हुँ ।'

आइतवार दिउँसो लोकान्तरसँग कुरा गर्दै श्रेष्ठले नेपालीहरूको हकहीतका लागि संस्था दर्ता गर्ने प्रक्रियामा प्रहरीले सोधपुछ गरेको बताए । 'हामी अन्तरक्रिया कार्यक्रममा थियौं, बाहिर सीआइडी बसिसकेको रहेछ,' श्रेष्ठले भने, 'नेपालमा लगानी गर्नका लागि हामीले गैर-आवासीय संस्था दर्ताको प्रक्रिया शुरू गरेका थियौं ।' त्यसैको सोधपुछका क्रममा सीआइडीले आफूलाई बोलाएको दावी श्रेष्ठले गरे ।

'सामान्य सोधपुछ पछि मलाई शनिवार नै प्रहरीले छाडेको हो,' श्रेष्ठले भने, 'तर रक्सी पिएर गाडी चलाएको भन्दै संचारमाध्यमहरूले समाचार सम्प्रेषण गरेको देख्दा दुख लागेको छ ।'