काठमाडौं – अहिलेका लागि सैन्य कारवाही अन्त्य भएको कुरामा जोड दिँदै अनि पाकिस्तानभित्रको आतंक संरचनाविरुद्ध लडाईं गर्नमा ध्यान केन्द्रित रहेको बताउँदै भारतले मंगलवार संयुक्त राष्ट्रसंघका सुरक्षा परिषद् सबै सदस्यसँग पहुँच बनाएको बताएको छ ।

जैश-ए-मोहम्मद आतंकवादी समूहका प्रमुख मसूद अजहरलाई आतंकवादीको सूचीमा राख्नुपर्ने माग सहित भारत सुरक्षा परिषद् पुगेको हो । पुलवामा आतंकवादी आक्रमणमा जैशको संलग्नतालाई जोड्ने एक दस्तावेजका प्रमुख अंश पनि उसले प्रस्तुत गरेको छ । 

उक्त दस्तावेजको पूर्ण पाठ गत साता इस्लामाबादलाई हस्तान्तरण गरिएको थियो । प्रधानमन्त्री इमरान खानले उक्त दस्तावेज मागेका थिए । दस्तावेजमा प्रमुख अंश संसारभरिका भारतीय राजदूतलाई दिइएको छ र उनीहरूले विदेशी सरकारसमक्ष त्यसलाई पेश गर्नेछन् । 

स्रोतहरूले स्पष्ट पारेअनुसार, अहिलेका लागि सैन्य कारवाही पूरा भए पनि अर्को आतंकवादी आक्रमण भएमा सबै विकल्प खुला रहेका छन् । 

सैन्य कारवाहीले पाकिस्तानभित्र रहेको आतंक संरचनामा प्रहार गर्ने क्षमता र इच्छा देखाएको स्रोतहरूले बताए र दिल्ली अहिले अन्तर्राष्ट्रिय वार्ताकारहरूलाई पाकिस्तानमाति दबाब दिन भनिरहेको छ । 

अमेरिका, बेलायत र फ्रान्सले मसूद अजहरलाई सुरक्षा परिषद्को सूचीमा सूचीकृत गर्ने प्रस्ताव गरेका छन् । दिल्लीले सुरक्षा परिषद्का सदस्य रहेका क्षेत्रीय प्रतिनिधि मुलुकहरूसँग यो विषय उठाउन भनेको छ । सुरक्षा परिषदमा पाँच स्थायी सदस्य र १० अस्थायी सदस्य छन् । 

चीन एक्लैले मसूद अजहरलाई विश्वव्यापी आतंकवादीमा सूचीकृत गर्ने सुरक्षा परिषद् प्रस्ताव १२६७ लाई पछिल्ला १० वर्षमा लगातार रोकेर राखेको थियो । इस्लामाबादको अनुरोधमा बेइजिङले सन् २००९, २०१६ र २०१७ मा यो रोक लगाएको छ । 

‘पुलवामा आतंकवादी आक्रमणका पछाडि पाकिस्तानमा रहेको जैश ए मोहम्मद समूहको हात रहेको हाम्रो दाबीलाई विश्वसनीय बनाउन चाहन्छौं । त्यसैले हामी आफ्नो दाबीलाई पुष्टि हुने दस्तावेज शेयर गर्दैछौं,’ स्रोतहरूले बताए । 

बेइजिङ आफैंले सूचीकरणलाई फेरि रोक्छ कि रोक्दैन भन्ने विषयमा पूर्वानुमान गर्न नसकिएपनि भारतले सकारात्मक संकेत पाएको स्रोतहरूको दाबी छ ।

एजेन्सी