राहुल गान्धीले गरे मोदीमाथि प्रहार – राफेलका सबै कागजात लुकाइयो, प्रधानमन्त्री छन् दोषी

काठमाडौं – राफेल सम्झौतामा सरकारले सबै कागजात लुकाएको र प्रधानमन्त्रीमाथि यसका विषयमा कारवाही हुनुपर्ने माग विपक्षी दल भारतीय कांग्रेसका अध्यक्ष राहुल गान्धीले लगाएका छन् । 

बिहीवार एक पत्रकार सम्मेलनमा बोल्दै राहुल गान्धीले कागज लुकाइएकोबाटै कागजमा सत्य कुरा भएको थाहा हुने बताए । ‘नरेन्द्र मोदीले सौदा गरिरहेका थिए भन्ने कुरा कागजमै लेखिएको छ । राफेल डीलले मोदीको बाइपास सर्जरी गरेको छ । मोदी सरकारको राजमा रोजगारी, किसानका मुद्दा अनि राफेलका फाइल सबै गायब छन् ।’

कागजमा नाम भएका व्यक्तिमाथि कारवाही हुनुपर्ने उनले बताए । 

‘एउटा नयाँ लाइन आएको छ – गायब भयो भनेर । सरकारको कामै सबैथोक गायब गर्ने हो । दुई करोड युवाको रोजगारी गायब भयो, किसानलाई दिने सही दाम गायब भयो, दोक्लम गायब भयो अनि राफेलका फाइलहरू पनि गायब भए,’ उनले भने । 

कांग्रेस अध्यक्षले भने, ‘तपाईंले जसलाई कारवाही गर्नुपर्ने हो गर्नुस् तर प्रधानमन्त्रीमाथि पनि कारवाही हुनुपर्छ । प्रधानमन्त्रीले सीबीआई प्रमुख हटाए अनि यसो गरेकोमा सर्वोच्च अदालतले पनि आलोचना ग–यो । उनले अनिल अम्बानीको खल्तीमा ३० हजार करोड रुपैयाँ हाले । अब मिडियाको जाँच गर्ने कुरा भइरहेको छ तर ३० हजार करोड घोटाला गर्नेमाथि कुनै जाँच भइरहेको छैन । जुन कुनै पनि कुरालाई मोडेर नरेन्द्र मोदीको बचाउ गरिँदैछ । सरकारको लक्ष्य चौकीदारलाई बचाउनु मात्र रहेको छ ।’

राहुल गान्धीले भने, ‘पहिले सबैले राफेलमा केही भएको छैन भन्थे तर हामीले राफेल डीलमा घोटाला भएको प्रमाणित गरिदियौं । अब त पत्रिकाका रिपोर्टहरूले पनि घोटाला भएको साबित गरिरहेका छन् र प्रधानमन्त्री पनि त्यसमा संलग्न छन् । मोदी आफैंले जाँच गराउन तयार रहेको भन्नुपर्छ । मोदी सरकार त जेपीसी गराउन पनि चाहिरहेको छैन ।’

एजेन्सी