काठमाडौं– प्रहरीले बानेश्वर क्षेत्रमा कुल ३७ लाख ३५ हजार रुपैयाँको लागतमा ५७ वटा सीसीटीभी जडान गरेको छ ।

सोमवार समुदाय-प्रहरी साझेदारी कार्यक्रम अन्तर्गत सीसीटीभी जडान गरिएको महानगरीय प्रहरी वृत्त नयाँ बानेश्वरका प्रहरी नायव उपरीक्षक गोविन्दराज काफ्लेले बताए ।  

कार्यक्रममा बोल्दै सीसीटीभी जडानले आपराधिक गतिविधि नियन्त्रणमा ठूलो सहयोग पुग्ने महान्यायाधिवक्ता अग्निप्रसाद खरेलले बताए । 

समुदाय–प्रहरी साझेदारी कार्यक्रम अन्तर्गत महानगरीय प्रहरी वृत्त नयाँ बानेश्वर, सामुदायिक विकास समिति, एकीकृत उपभोक्ता संघ एवं सुरक्षित नागरिक समाजको सहकार्यमा काठमाडौं महानगरपालिका–३२ सुविधानगरस्थित विभिन्न स्थानमा जडान गरिएका सीसीटीभी क्यामराको महान्यायाधिवक्ता खरेलले उद्घाटन गरे । कार्यक्रममा उनले सीसीटीभी क्यामेराको साँचो प्रहरी अतिरिक्त महानिरीक्षक ठूले राईलाई हस्तान्तरण समेत गरेका थिए । 

अपराध र अपराधीहरू हाम्रै वरिपरि रहने हुनाले प्रहरीलाई अपराधको अनुसन्धान गर्ने क्रममा समुदायको सहयोगी भूमिका हुन जरुरी रहेको उनले बताए । 'कतिपय अपराधको अनुसन्धानमा अपराधी पत्ता लाग्न समय लागे पनि अधिकांश घटनाका अपराधी पत्ता लागी कानूनी दायरामा आएको समेत आएका छन्,’ उनले भने ।  

प्रहरी अतिरिक्त महानिरीक्षक ठूले राईले नेपाल प्रहरीले अंगीकार गरेको समुदाय–प्रहरी साझेदारी कार्यक्रम विगतमा गरिएका कार्यक्रमहरूको अनुभवलाई माझेर परिष्कृत रूपमा आएको हुनाले यसले निरन्तरता पाउने चर्चा गर्दै यस्ता कार्यक्रममा सम्पूर्ण समुदायको पूर्ण विश्वास र सहयोग प्राप्त हुने अपेक्षा राखे । 

निष्पक्ष न्याय सम्पादनको निम्ति सीसीटीभी क्यामेराको उल्लेखनीय महत्त्व रहेको बताउँदै प्रहरी नायव महानिरिक्षक क्षेत्रीले यसमार्फत २०७५ सालमा १६ हजारभन्दा बढी ट्राफिक नियम उल्लंघनमा संलग्नलाई कारवाही गरिएको, ९३ मुद्दामा हिट एण्ड रनमा नम्बर नखुलेका सवारी साधनहरु पछि पहिचान भएका तथा ४६ लुटपाटको घटनामा संलग्नहरूलाई पक्राउ गर्न सफल भएको बताए ।  

महानगरीय प्रहरी वृत्त नयाँबानेश्वरका प्रहरी नायव उपरीक्षक गोविन्दराज काफ्लेले कार्यक्रम सम्बन्धी जानकारी दिँदै उक्त क्षेत्रमा कूल ३७ लाख ३५ हजार रुपैयाँको लागतमा हाल ५७ वटा सीसीटीभी जडान गरिएको र १७ वटा जडान गर्ने क्रममा रहेको जानकारी दिए ।