वरिष्ठ पत्रकार तथा साहित्यकार आचार्य कमल रिजालद्वारा लिखित उपन्यास ‘सुकर्म’को अंग्रेजी संस्करण ‘डीप क्वेस्ट' प्रकाशित भएको छ । २०६९ सालमा नेपालीमा प्रकाशित उक्त उपन्यासको अंग्रेजी संस्करणलाई साहित्य पोस्ट नेपालले प्रकाशित गरेको हो । 

विगत पाँच हजार वर्षदेखि पाँच सय वर्षसम्मका गतिविधि केलाउने प्रयास भएको यस उपन्यासको हिन्दी संस्करण भने २०७४ सालमा नेपाल प्रज्ञाप्रतिष्ठानले प्रकाशित गरेको थियो ।  

मधुपर्क मासिक र गोरखापत्र दैनिकका प्रधान सम्पादक रहिसकेका कमल रिजालको चर्चित उपन्यासको अंग्रेजी संस्करण प्रकाशित गर्न पाउनु गौरवको विषय भएको प्रकाशक साहित्य पोस्टका प्रधान सम्पादक अश्विनी कोइराला बताउँछन् । 

अनुवादक महेश पौड्यालका अनुसार साहित्यकारहरू प्रायः प्रसङ्गअनुसार विम्ब प्रयोग गर्छन् तर यो उपन्यास भने आफैँमा बिम्ब हो, विम्बात्मक छ,  बिम्बात्मक अवस्थामा रहेको छ । नेपालमा क्रमशः अंग्रेजीभाषी पाठक पनि बढ्दै गएकाले तिनैलाई लक्षित गरी अंग्रेजी संस्करण प्रकाशित गराउने रहर जागेको लेखक रिजालको भनाइ छ । 

लेखक रिजालका अनुसार उपन्यासले वैदिक वैज्ञानिक र विज्ञानले देखाएको मार्ग अनुसरण गर्दै ग्रहहरूका गति, अवस्थितिलगायत समग्र खगोल भूगोलको स्वरूप र विशेषता केलाउने प्रयास गरेको छ । यस क्रममा उपन्यासले आधुनिक विज्ञानले आगामी पाँच सय वर्षमा खासगरी विज्ञान प्रविधि र अन्तरिक्ष विज्ञानको क्षेत्रमा के–कस्तो फड्को मार्न सक्ला भन्नेबारेमा आकलन गर्ने प्रयास गरेको छ ।