बलिउड अभिनेता शाहरुख खानकी छोरी सुहाना खान ठूलो पर्दाका चलचित्र (फिल्म)मा ‘डेब्यू’ गर्ने तयारीमा छिन् । फिल्मलाई शाहरुख आफैँले लगानी गर्दैछन् । आफ्नो ब्यानर रेड चिलिज इन्टरटेनमेन्टमार्फत उनी फिल्म बनाउँदैछन् ।

हाल प्रि–प्रोडक्सन चरणमा रहेको फिल्ममा शाहरुखले दुई सय करोड भारतीय रुपैयाँ लगानी गरेको भारतीय सञ्चारमाध्यमले जनाएका छन् ।

छोरीको पहिलो फिल्म सफल बनाउन शाहरुख लागिपरेका छन् । उनको टीम एक वर्षयता गृहकार्य गरिरहेको छ । फिल्मसँग जोडिएका निर्माता तथा निर्देशक सिद्धार्थ आनन्द पनि केही अन्तर्राष्ट्रिय स्टन्ट निर्देशकलाई फिल्ममा जोड्न लागिपरेका छन् ।

सिद्धार्थ र शाहरुख एकसाथ मिलेर फिल्मलाई ग्लोबल एक्सन थ्रिलर बनाउने तयारीमा छन् । त्यहीकारण उनीहरू अन्तर्राष्ट्रिय स्टन्ट विज्ञसँग फिल्मका लागि स्टन्ट डिजाइन गरिरहेका छन् । उनीहरू भीएफएक्सका माध्यमबाट फिल्मलाई रियल टच दिन चाहिरहेका छन् ।

शाहरुख भने यतिबेला सुजोय घोषको एक्सन फिल्म ‘किंग’को काम गरिरहेका छन् । 

फिल्म ‘किंग’को सुटिङ यसै वर्षको मेमा शुरू हुँदैछ ।