क्रिकेटर सन्दीप लामिछानेविरुद्धको मुद्दा हेर्न नभ्याइनेमा राखिएको छ । समय अभावका कारण मुद्दालाई नभ्याइनेमा राखिएको हो ।

उच्च अदालत पाटनका न्यायाधीशद्वय धीरबहादुर चन्द र चन्द्रमणि ज्ञवालीको संयुक्त इजलासले आगामी  हप्ता प्राथमिकतामा पर्ने गरी पेशीमा चढाई नियमानुसार पेश गर्न आदेश गरेको हो ।

'पक्षहरूको तर्फबाट रहनुभएका कानून व्यवसायीहरूको संख्या र निजहरूलाई बहस गर्न लाग्ने समय समेतलाई मध्येनजर गर्दा प्रस्तुत मुद्दा आज छैठौं नम्बरमा पेशीमा चढेको कारण समयाभावले हेर्न नभ्याइएको हुँदा आगामी हप्ता प्राथमिकतामा पर्ने गरी पेशीमा चढाई नियमानुसार पेश गर्नू,' आदेशमा उल्लेख छ ।

उच्च अदालत पाटनका प्रवक्ता तिर्थराज भट्टराईका अनुसार उनको मुद्दामा यही वैशाख २३ गते पेशी तोकिएको छ ।

परिवर्तित नाम गौशाला २६ लाई जबरजस्ती गरेको कसुरमा लामिछानेलाई कैद तथा सजाय गरिएको काठमाडौं जिल्ला अदालतको आदेश विरुद्ध लामिछानेले उच्च अदालत पाटनमा पुनरावेदन गरेका हुन् ।