​संसद् कांग्रेसको दादागिरी चल्ने ठाउँ होइन, बन्धक बनाउन पाइँदैन : ओली

नेकपा एमालेका अध्यक्ष केपी शर्मा ओलीले सत्ता स्वार्थ पूरा नहुँदा कांग्रेसले संसद्‌लाई बन्धक बनाएको आरोप लगाएका छन् । उनले संसद् कांग्रेसको दादागिरी चल्ने ठाउँ नभएको टिप्पणी गरे ।

एमाले संसदीय दलको बैठकलाई बुधवार सम्बोधन गर्दै ओलीले कोही व्यक्तिलाई आरोप लगाउने तर उसलाई बोल्न नदिने कांग्रेसको अड्डी लोकतान्त्रिक नभएको बताएका हुन् ।

‘संसद् कांग्रेसको दादागिरी चल्ने ठाउँ होइन । सांसदले बोल्न नपाउने ? उसले (कांग्रेस)ले आरोप लगाउने, आरोप लगाएको व्यक्ति बोल्न नपाउने ?’, ओलीले भने, ‘कुनै माननीयमाथि व्यक्ति तोकेर छानबिन गर्न, को न्यायाधीश हुन्छ ? कांग्रेसको सांसद न्यायाधीश हुन्छ ?’

अध्यक्ष ओलीले भ्रष्टाचारी ठहर भएका सांसदले कतै मुद्दा नचलेका विरुद्ध छानबिन समिति माग्नु हास्यास्पद भएको बताए ।

‘भ्रष्टाचारमा अपराधी ठहरिएका (टेकबहादुर गुरुङ)लाई भित्र ल्याएर उ भ्रष्टाचारी हो, छानबिन आयोग गठन गर भन्ने ? कांग्रेसलाई सरम हुँदैन ? नियम कानून पढेको छैन ?’, ओलीले प्रश्न गरे ।

अनेक आरोपहरूमा फाइल दबाउँदा हैरान भएको कांग्रेसले एमालेका विरुद्ध जथाभावी बोल्नु आपत्तिपूर्ण भएको उनले बताए ।