पसिना पुछ्दै भोटमाग्न पुगेका सिलवालले भने–कांग्रेसले गर्दा विकास गर्न सकिएन (भिडियोसहित)

कात्तिक ३०, २०७४

काठमाडौं, ३० कार्तिक – प्रतिनिधिसभा र स्थानीयसभाको चुनावी मिति नजिकिँदै गर्दा ललितपुर–१ मा चुनावी सरगर्मी ह्वात्तै बढेको छ । खासगरी नेपाली कांग्रेस, नेकपा एमाले र नयाँ शक्ति पार्टीका झण्डाले ललितपुर–१ का गाउँ तथा बजारको रौनक चुनावमय बनाएको छ । ठूला दलका मुख्य उम्मेदवार आफ्नो चुनावी क्षेत्रमा दिनभरी नै घरदैलो अभियानमा खटिएका छन् भने गाउँलेलाई पनि चुनावप्रति चासो लाग्न थालेको छ ।


ललितपुरको टीका भैरव गाउँ क्षेत्रका जनतासँग कुनै पनि दलका नेता पनि भोट माग्न नआएको स्थानीयले बताइरहँदा बेला टीका भैरवदेखि केही टाढाको गाउँ सिखर्पा वरपर भने वाम गठबन्धनका तर्फबाट उम्मेदवारी दिएका एमालेका उम्मेदवार नवराज सिलवालले मतदातासँग नमस्कार गर्दै मत मागिरहेका थिए ।


ADVERTISEMENT


चुनावी प्रचार चलिरहँदा हामीले उम्मेदवारहरुले भोट माग्न नभ्याएका मतदातासँग सोधेका थियौं, ‘यसपालि कस्ता उम्मेदवार चुन्दै हुनुहुन्छ?’


‘आजसम्म उम्मेदवार चुनेर केही पाएझैं लाग्दैन, हामीलाई कुन नेता उठेका छन् भन्ने पनि थाहा छैन’, टीका भैरवकी स्थानीयवासी शारदा खड्काले भनिन्, ‘पञ्चायत कालदेखि भोट हाल्दै आएकी छु, कसैले यो क्षेत्रका लागि केही गरेजस्तो पनि लाग्दैन ।’


टीका भैरव बजारमा सिलाइ कटाइको पसल सञ्चालन गरेर बसेकी जानुका खड्काले पनि नेताप्रति आफ्नो कुनै विश्वास नभएको बताइन् । ‘सधै उही प्रक्रिया दोहोरिरहन्छ, हामीलाई त चुनावमा भोट नै नहालौं कि भन्ने लाग्न थालिसक्यो ।’, उनले सुनाइन् ।


त्यस्तै टीका भैरवकै कृष्णबहादुर खड्काले काठमाडौंबाट दश किलोमिटर टाढाको बस्ती भएर पनि उक्त गाउँ धेरै टाढाको विकट गाउँजस्तै गुनासो पोखे । ‘गाउँमा बाटो त आएको छ तर समयमा सवारी पाइँदैन, काठमाडौं नजिकै भएर पनि विकट गाउँजस्तै भएको छ ’, उनले थपे, ‘नेताले जनताका लागि गर्ने भन्छन्, तर आफ्ना लागि गर्छन् ।’


आँगन छेउमा बसेर साग काट्दै गरेकी स्थानीयवासी जानकी श्रेष्ठले भने आफूलाई उम्मेदवारको विश्वास लाग्ने बताइन् । ‘हामीलाई त उम्मेदवारको विश्वास लाग्छ, यिनै नेताले गर्दा त गाउँमा मोटर आएको छ’, उनले साग केलाउँदै लोकान्तरलाई सुनाइन्, ‘नेताको त विश्वास गर्नै प–यो नि, अलिअलि भए पनि कसैले गरेका छन् भने नेताले त गरेका छन् ।’


हिँडेरै भोट माग्दै नवराज

सिलवाल, महिलालाई नमस्कार, पुरुषसँग हस्तमिलन

टीका भैरवका जनतासँग भोट माग्न भ्याइ नसकेका वाम गठबन्धनका उम्मेदवार नवराज सिलवाल भने दिउँसोको चर्को घाममा सिखर्पा वरपरका मतदातासँग भोट माग्दै थिए । कार्यकर्तामाझ घेरिएका सिलवालले उक्त क्षेत्रको विकास गर्न र यही क्षेत्रमै रोजगारको सृजना गर्न आफूलाई जिताउन आह्वान गरे । सिखर्पाको विद्यालयमा बोल्दै सिलवालले कांग्रेसलाई पटकपटक जिताउँदा पनि यो क्षेत्रको विकास नगरेकाले अहिले वाम गठबन्धनलाई जिताउनुपर्नेमा जोड दिए । ‘यो ठाउँका किसानलाई उन्नति पु–याउने र यही क्षेत्रमा उद्योग खोल्नेछौं’, उनले थपे, ‘कांग्रेसको नीतिले गर्दा विकास गर्न सकिएको छैन, त्यसैले अहिले वाम गठबन्धनले जिताउनुपर्छ ।’


स्कूल (हालको हिर्खपा सामुदायिक पुस्तकालय केन्द्र) को चउरमा जम्मा भएका मतदातालाई भाषण गरिसकेपछि सिलवालले जनतामाझ घरदैलो अभियान थालेका थिए । सिलवालले प्रत्येक घरका महिला मतदातालाई टाढैबाट नमस्कार टक्राइरहेका थिए भने पुरुष उम्मेदवारसँग हात मिलाउँदै अगाडि बढिरहेका थिए । कार्यकर्ताले मतदातालाई वाम गठबन्धनका उम्मेदवार ‘नवराज सिलवाल’ भन्दै चिनारी दिइरहेका थिए ।


भाषणपछि के भने मतदाताले?

सिलवालको भाषणपछि हामीले मतदातालाई सोध्यौं, ‘के तपाईलाई उम्मेदवारको भनाइमा विश्वास लाग्यो?’


‘विकासको नारा बाँड्छन्, योभन्दा पहिले पनि धेरैले बाँडे, भएन, अहिले पनि त्यसै भन्दैछन्’, कोणसभामा भेटिएका कमल कुवँरले सुनाए, ‘वाम गठबन्धन भएकाले जित्न त जित्लान् कि ।’


स्थानीयवासी पवित्रा घिमिरेले सिलवालको भाषणले आफू प्रभावित भएको बताइन् । ‘भूकम्पले भत्काएका घर अझै ठाडो पार्न सकेका छैनौं, उहाँहरुले यो क्षेत्रका लागि गर्छौं भन्नुभएको छ, विश्वास लागेको छ’, छेउमै उभिएकी ठूलीकान्छी नगरकोटीले सुनाइन्, ‘टहरामा बस्दा बिरामी भइसक्यौं, उनले जिते केही गर्थे कि !’


गाउँमा चुनावी चर्चा चलिरहे पनि गाउँले भने आफ्नै दैनिकीलाई प्राथमिकता दिएका छन् । गाउँमा पालैपालो विभिन्न पार्टीका उम्मेदवार मत माग्न आइरहेका छन् भने मतदाताले पनि उम्मेदवार आउँदा मुसुक्क मुस्कुराइदिएका छन् । उम्मेदवारका चुनावी आश्वासन त आर्कषक छन्, तर कतिपय मतदाताले आश्वासन पत्याउन छोडिसकेका छन् । सिर्खपाका मतदाता भन्छन्, ‘आउनुहुन्छ, नमस्कार गरेर जानुहुन्छ, हामी त केही बुझ्दैनौं ।’

कात्तिक ३०, २०७४ मा प्रकाशित

अर्घेलो थापा

अर्घेलो लोकान्तरका कला संवाददाता हुन् । 

लेखकबाट थप...

प्रतिक्रिया दिनुहोस