यात्रु ठग्न पाउनुपर्ने मागगर्दै पोखरामा सार्वजनिक यातायाद बन्द, विन्द्यवासिनीको अवज्ञा

पुस २७, २०७४

पोखरा, २७ पुस–मिटरमा चल्न नमान्ने १८ जना ट्याक्सी चालकहरुलाई कारवाही गरेपछि आक्रोशित बनेका र साँगठनिक एकताको नाममा दादागिरीमा उत्रिएका नेपाल यातायात ब्यवसायी राष्ट्रिय महासंघ अन्तर्गतका सार्वजनिक सवारी साधनहरु आज पोखरामा चलेका छैनन् । तर सांगठनिक एकताको नाममा दादागिरीकाविरुद्ध पोखरामा सञ्चालित विन्द्यवासिनी बस समितिले आफ्ना बसहरु भने सञ्चालन गरिरहेको छ । 

नेपाल यातायात ब्यवसायी राष्ट्रिय महासंघ अन्तरगतका सार्वजनिक सवारी साधनहरु नचल्दा मर्माहित बनेका पोखराका सर्वसाधारणले विन्द्यवासिनी बस समिति मातहत चलेका बसहरुका कारण केही राहत पाएका छन् । 


ADVERTISEMENT

नेपाल यातायात ब्यवसायी राष्ट्रिय महासंघ अन्तरगत रहेका पोखरा बस व्यवसायी समिति, बेगनासताल बस व्यवसायी समिति, श्रृयंगा बस व्यवसायी समिति, व्यास बस व्यवसायी समिति, पृथ्वी राजमार्ग बस सञ्चालक समिति मातहतका बसहरु चलेका छैनन् । त्यस्तै ट्याक्सी व्यवसायी समिति पोखरा मातहतका ट्याक्सीहरु पनि पोखरामा चलेका छैनन् ।

मिटरमा चल्न नमान्ने १८ जना ट्याक्सी चालकहरुलाई प्रहरीले मंगलबार पक्राउ गरेर हिरासतमा राखेपछि आक्रोशित बनेका ट्याक्सी चालकहरुले बुधबार पोखराको पृथ्वीचोक–लखनचोकमा ट्याक्सी तेस्र्याएर प्रहरी प्रशासनकाविरुद्ध चर्को नाराबाजी गरेका थिए । त्यस सडक अवरोधलाई कास्कीको प्रहरी प्रशासनले बल प्रयोग नै नगरी खुलाएको थियो । 

तर ट्याक्सी व्यवसायी समिति पोखराले आफ्नो शान्तिपूर्ण आन्दोलनमा प्रहरी प्रशासनले हस्तक्षेप गरेको भन्दै आज पोखरामा यातायात हढ्तालको घोषणा गरेको थियो । ट्याक्सी व्यवसायी समिति पोखराको हड्ताललाई समर्थन गर्दै नेपाल यातायात ब्यवसायी राष्ट्रिय महासंघ अन्तरगतका यातायातसँग सम्बन्धित व्यवसायी समितिहरुले आज पोखरामा आफ्ना सार्वजनिक सवारी साधनहरु चलाएका छैनन् ।

पुस २७, २०७४ मा प्रकाशित

ओम हमाल

हमाल लोकान्तरका लागि चार नम्बर प्रदेशका प्रतिनिधि हुन् । 

लेखकबाट थप...

प्रतिक्रिया दिनुहोस