काठमाडौं, १३ फागुन– एमाले र माओवादी भित्र मन्त्रीका आकांक्षी धेरै भएपछि मन्त्रिपरिषद् विस्तारमा ढिलाई  हुने भएको छ ।

माओवादीको समर्थनमा फागुन ३ गते प्रधानमन्त्री नियुक्त भएका प्रधानमन्त्री केपी शर्मा ओलीले १० दिन वितिसक्दा पनि तीन सदस्यीय मन्त्रिपरिषद्लाई विस्तार गर्न सकेका छैनन् ।

मन्त्रालयको संख्या घटाएर प्रधानमन्त्रीसहित १८ मन्त्रालय बनाउने निर्णय भएको छ । तीमध्ये एमालेले १० र माओवादी केन्द्रले ७ मन्त्रालय पाउने सहमति दुई दलबीच भएको छ ।
तर दुबै दलहरुमा मन्त्रीको आकांक्षी धेरै हुँदा एमाले र माओवादी पार्टीका अध्यक्षहरुलाई मन्त्री चयनमा समस्या परेको छ ।

एमाले स्थायी समितिको बैठकले पार्टी अध्यक्ष एवं प्रधानमन्त्री केपी शर्मा ओलीलाई मन्त्री चयनको जिम्मेवारी दिएको छ । तर अकांक्षी धेरै भएका र विभिन्न गुटहरुलाई समेत मिलाउनु पर्ने भएका कारण ओली समस्यामा परेका छन् । आफ्नै गुटका उच्च तहका नेतालाई मन्त्रीसहित मन्त्रालयको व्यवस्थापनले पनि उनी थप समस्यामा परेका छन् ।

‘प्रधानमन्त्री ज्यूले आज साझँसम्ममा मन्त्री बन्ने पार्टी नेताहरुको टुंगो लगाउनु हुन्छ,’ एमालेका एक नेताले भने,‘माओवादीले पनि आज साँझै मन्त्रीहरुको नाम दिएको खण्डमा भोलि मन्त्रीहरुको शपथ हुन्छ ।’

नेकपा माओवादी केन्द्रका अध्यक्ष पुष्पकमल दाहाल प्रचण्डले पनि आइतबार साँझसम्ममा मन्त्रीहरुको टुंगो लाग्ने बताउँदै सोमबार तीन बजे विस्तारित मन्त्रिपरिषद्का सदस्यहरुले शपथ लिने बताएका छन् । तर, उनको पार्टीमा मन्त्रीका आकांक्षीको व्यवस्थापनमा भने जटिलता रहेको छ ।

माओवादीबाट सरकारको नेतृत्व गर्ने भनिएका रामबहादुर थापा बादल र नेता वर्षमान पुनबीच गृहमन्त्रालयको दाबीले प्रचण्ड तनावमा परहेको माओवादीका एक नेताले बताए ।

‘बादल र पुन दुबै जना गृहमन्त्रालयमा दाबी गरिरहनुभएको छ,’माओवादीका एक नेताले भने,‘त्यसलाई व्यवस्थापन गर्न सकिनासाथ सरकारमा पठाउने मन्त्रीको टुंगो लाग्छ ।’

माओवादीमा प्रचण्ड, नारायणकाजी र बादललाई सरकारमा पठाउने मन्त्री छान्ने जिम्मा दिइएको छ ।

संघीय समाजवादी र सूर्य चुनाव चिह्न लिएर चुनाव लडेका हृदयश त्रिपाठीसहितका नेतालाईसमेत मन्त्री बनाउने पक्षमा प्रधानमन्त्री छन् । माओवादीले भने अन्य दललाई सरकारमा सहभागी गराउँदा एमालेको भागमा परेको १० मन्त्रालयबाट घट्ने तर्क गर्छ ।

१० मन्त्रालयमा एमालेबाट तीन गुणा आकांक्षी

एमालेले १० मन्त्रालय पाउने समझदारी भए पनि पदाधिकारीसहित तीन गुणा बढी आकांक्षी छन् ।  उपाध्यक्ष भीमबहादुर रावल, महासचिव ईश्वर पोखरेल, सचिवहरू प्रदीप ज्ञवाली, योगेश भट्टराई, गोकर्ण विष्ट, स्थायी समिति सदस्य सुरेन्द्र पाण्डे, छविलाल विश्वकर्मा, पोलिटब्युरो सदस्य भानुभक्त ढकाल, केन्द्रीय कार्यालय सचिव कृष्णगोपाल श्रेष्ठसहित थुप्रै आकांक्षी देखिएका हुन् ।