काठमाडौं, १० वैशाख– इंग्लिस प्रिमियर लिग फुटबलअन्तर्गत आइतबार राति भएको खेलमा म्यानचेस्टर सिटीले शानदार जित दर्ता गरेको छ । घरेलु मैदानमा भएको खेलमा पेप गार्डिवलाको टिम म्यानचेस्टर सिटीले स्वान्सी सिटीलाई ५–० ले हराएको हो । 

उसका लागि डेविड सिल्भा, रहिम स्ट्रर्लिङ्ग, केविन डी ब्राउन, बर्नार्डो सिल्भा र गाब्रिएल जिससले गोल गरे । पहिलो हाफमा २–० को अग्रता लिएको म्यानचेस्टर सिटीले दोस्रो हाफमा थप तीन गोल गरेको हो ।

पुछारको वेष्ट ब्रोमसँग दोस्रो स्थानको म्यानचेस्टर युनाइटेड पराजित भएपछि सिटीले यसअघि नै उपाधि पक्का गरेको थियो । उपाधि जितेपछिको पहिलो खेलमा सिटीले शानदार जित दर्ता गरेको हो । सिटीले पछिल्लो सात सिजनमा तेस्रो पटक उपाधि उचालेको हो ।

जितपछि चार खेल बाँकी हुँदा च्याम्पियन सिटीको ९० अंक भएको छ । यो चेल्सीले सन् २००४–०५ को सिजनमा बनाएको कीर्तिमानी अंक भन्दा पाँच अंक मात्रै कम हो ।