विराटनगर, ९ जेठ –जिल्ला प्रहरी कार्यालय मोरङबाट अदालतमा उपस्थित गराउने क्रममा सुन तस्करीमा संलग्न उच्च प्रहरी अधिकारीलाई बिनाहत्कडी ल्याइएको थियो ।  
अदालतमा म्याद थपदेखि मुद्दा दायर हुँदासम्म पनि सोहि क्रम दोहोरियो । 

 मुद्दा दायर भएको १९ दिन पछिमात्र थुनछेक बहस सकियो । त्यो बीचमा उनीहरु कुनै अभियुक्तमा भन्दा पनि प्रहरीकै बहालवाला जस्तै गरी हिँडिरहेका र मोबाईलमा समेत कुरा गरिरहेका देखिन्थे ।  
यसैक्रममा जिल्ला अदालत मोरङले आदेश दियो, ‘सुन तस्करका अभियुक्त २ जना बाहेक सबैलाई पुर्पक्षका लागि थुनामा राख्नु ।’ 

२ जनामा पनि एकजनालाई १५ हजार धरौटी मागिएको थियो भने एकजनाको हकमा साधारण तारेखमा छाडिएको हो । 

छाडिएकाहरु बिष्णुबहादुर खड्का प्रहरी जवान र अम्मरबहादुर थापामगर हवल्दार  हुन्। 

 उनीहरु दुबैलाई शुरुका दिनदेखि नै हत्कडी लगाएर अदालत पुर्याईएको थियो । उनीहरु छुटीसकेका छन्  । 

तर अदालतले दोषी रहेको भन्दै कारागार चलान भएका अन्य उच्च प्रहरी कर्मचारीहरु भने  जेल जाँदैगर्दा पनि हत्कडीमा देखिएनन् । 

कारागार चलान भएका २८ जना मध्ये गोबिन्द निरौला, दिवेश लोहनी, विकासराज खनाल, सञ्जय बहादुर राउत, प्रजित केसीलाई हत्कडी नलगाइएको हो  । अरु बाँकीलाई हत्कडीसहित प्रहरीको मिनी ट्रकमा सहित कोचियो । उनीहरुलाई अर्कै गाडीमा लगिएको थियो । 

कारागारमा क्षमता नभएपछि ...

मोरङ जिल्ला अदालतबाट मंगलवार पुर्पक्षका लागि पठाईएका २८ जना सुनकाण्डका बन्दीहरुलाई कारागारमा नअटाएपछि पुनः प्रहरी कार्यालयमा फर्काइएको छ । राख्ने ठाउँ नभएको जनाउँदै कारागारले राख्न नमानेपछि जिल्ला प्रहरी कार्यालयमा फिर्ता गरिएको थियो । 

कारागार प्रमुख शंकर प्रसाद पौडेलले प्रमुख जिल्ला अधिकारीलाई आग्रह गरिएपछि प्रहरीले फर्काएको थियो । २ सय ५० कैदी बन्दी क्षमताको कारागारमा मंगलवार २८ जना पुग्नु अघिसम्म ७ सय ५० जना कैदीबन्दी रहेको उनले बताए । 

प्रहरीका अनुसार, सुन तस्करी र सनम शाक्य हत्या प्रकरणमा संलग्न प्रहरीका उच्च अधिकारी सहित सबै २८ जना बन्दीलाई जिल्ला प्रहरी कार्यालय मोरङमा राखिएको छ । 

मंगलवार पक्राउ परेका सुनकाण्डका मुख्य अभियुक्त भनिएका गोरे भन्ने चुडामणी उप्रेती पनि जिल्ला प्रहरी कार्यालय मोरङकै हिरासतमा रहेका छन् । 

यसैबीच जिल्ला प्रहरी कार्यालयमा राखिएका २८ जनालाई आज अन्यत्र पठाउने तयारी भईरहेको छ । मोरङका प्रमुख जिल्ला अधिकारी रामप्रसाद आचार्यले मोरङ कारागारमा राख्ने ठाउँ नभएपछि उनीहरुलाई क्षेत्रीय कारागार कार्यालय झुम्का लग्ने तयारी भईरहेको जानकारी दिए । 

हिजो साँझ भएकोले ब्यवस्थापनमा केही समस्या देखिएकोले आज उनीहरुको ब्यवस्थापन गरिने प्रजिअ आचार्यको भनाई छ ।
 

‘मोरङ कारागारमा २सय ५० क्षमता रहेकोमा  ४ गुणा बढी कैदी बन्दी रहेकोले त्यहाँ अटाउने ठाउँ छैन’,  आचार्यले भने, ‘नजिकै भनेको झुम्का कारागार हो  । त्यहाँ १६ सय क्षमतामा १४ सय मात्र कैदीबन्दी रहेको भन्ने जानकारीमा आएको छ, त्यहीँ पठाउने बारेमा छलफल हुँदैछ ।’