काठमाडौं, १० असार – अमेरिकाको वाशिङटनमा बलात्कार र हत्याको एक मुद्दा सुल्झाउन प्रहरीलाई ३२ वर्ष लाग्यो । अपराधको आरोपितले रेस्टुराँमा फ्याँकेको न्यापकिनका आधारमा उसलाई प्रहरीले पक्रेको हो ।

आरोपित ६६ वर्षीय गेरी चार्ल्स हार्टम्यान हुन् । उनले सन् १९८६ मा १२ वर्षीया एक किशोरीलाई बलात्कारपछि हत्या गरेका थिए । उनलाई हिरासतमा लिएर पीयर्स काउन्टीमा एउटा मुद्दा दर्ता गरिएको छ । 

प्रहरीले यो घटना वाशिङटनको तकोमामा भएको बतायो । मिशेल वेल्च र उनका दुई बहिनीहरू पगेट पार्क गएका थिए । मिशेल ११ बजे लन्च गर्न घर गइन् र उनका बहिनीहरू वाशरूमतिर गए । दुवै बहिनी पार्कमा आउँदा मिशेललाई देखेनन् । 

त्यसपछि उनीहरूले धाइआमालाई सूचना दिए र उनले उनीहरूको आमालाई बताइन् । प्रहरीले मिशेललाई खोज्न थाल्यो । कुकुरको सहायताले खोज्दा मिशेलको शव त्यही राति एक सुनसान ठाउँमा फेला प–यो । उनलाई बलात्कारपछि हत्या गरी त्यहाँ फालिएको थियो । 

प्रहरीले प्रमाण त जम्मा ग–यो तर कसैलाई पक्राउ गरेन । घटनास्थलबाट प्राप्त प्रमाणको आधारमा एक व्यक्तिको डीएनए प्रोफाइल तयार पारियो । तर प्रादेशिक र केन्द्रीय डेटाबेसमा त्यसको रुजु भएन । 

यो मुद्दा कोल्ड फाइलमा थन्कियो । पछि सन् २०१६ मा प्रहरीले यो मुद्दाको फाइल खोल्यो अनि जेनेटिक जिनियोलजिस्टका साथ अनुसन्धान शुरू ग–यो । दुई दाजुभाइलाई सम्भावित आरोपितको रूपमा पहिचान गरेर निगरानी गर्न
थालियो । अनुसन्धानमा खटिएका जासूस स्टिभ रिपोलीले हार्टम्यानलाई पछ्याउँदै रेस्टुराँसम्म पुगे । त्यहाँ हार्टम्यानले एक सहकर्मीसँग कफी पिए ।

रिपोलीले भने, ‘मैले धेरैचोटि उसलाई न्यापकिन प्रयोग गरेको देखें । उसले न्यापकिन कुल्चियो र एक ब्यागमा हाल्यो । उसले त्यो ब्याग पनि कुल्चियो र रेस्टुराँबाट बाहिर जानुअघि न्यापकिन ब्यागमा हाल्यो ।’

रिपोलीले त्यो न्यापकिन वाशिङटन स्टेट पट्रोल क्राइम ल्याबोरेटोरी पठाए । मंगलवार ल्याबले प्रहरीलाई न्यापकिनमा भएको डीएनए घटनास्थलबाट प्राप्त डीएनएसँग मिल्ने बतायो । त्यसपछि बुधवार प्रहरीले हार्टम्यानलाई हिरासतमा
लियो ।

एजेन्सी