काठमाडौं –नेपाल कम्युनिस्ट पार्टी (नेकपा) का युवा नेता एवं सांसद महेश बस्नेतले बाढीपीडितको संवेदनामा खेलेर सामाजिक सञ्जालमा पानीजहाजको कुरा गर्दै उडाउनेहरूलाई कडा कारवाही गर्न सरकारसँग माग गरेका छन् ।

प्रतिनिधिसभाको बिहीवारको बैठकमा एक फेसबुक प्रयोगकर्ताले मानसिक संवेदनामा खेल्नेविरुद्ध यस्तै आसयको स्टाटस लेखेकोमा धन्यवाद दिँदै बस्नेतले सो कुरा बताएका हुन् ।

'भक्तपुरका जनता बाढी र पहिरोको पीडामा छन् । कतिपय मान्छेहरू फोटो खिचेर सामाजिक सञ्जालमा राख्दै 'पानी आएछ, अब जहाज कहिले आउँछ ?' भनेर उडाइरहेका छन् । सक्नुहुन्छ भने भक्तपुर र देशभरका बाढीपीडितलाई सहयोग गर्नुस्, सक्नुहुन्न भने यो संवेदनामा खेलेर पानीजहाजको कुरा नगर्नुस्,' बस्नेतले भने, 'सामाजिक सञ्जालमा यस्ता वाइयात कुरा गर्नेलाई कडाभन्दा कडा कारवाही गर्नुपर्छ । साइबर क्राइमको कानून कडा ढंगले लागू होस्, सञ्चार मन्त्रालय र सरकारको म ध्यानाकर्षण गराउँछु ।'

साथै बस्नेतले टिप्परका कारण दुर्घटना बढिरहेका बेला दिउँसो टिप्पर सञ्चालनमा रोक लगाएर सरकारले प्रशंसायोग्य काम गरेको पनि बताए ।