विराटनगर– आजबाट विराटनगर महानगरपालिको मुख्य बजार ट्राफिक चोकदेखि जलजला चोकसम्म पार्किङ निषेध गरिएको छ । मुख्य बजार क्षेत्रमा एकतर्फी पार्किङ हुँदै आएको थियो । 

पार्किङका कारण प्रदेश नम्बर १ को अस्थायी राजधानीमा ट्राफिक व्यवस्थापनमा समस्या देखिएपछि जिल्ला ट्राफिक प्रहरी कार्यालयले साउन १ गते अर्थात आजदेखि पार्किङ निषेध गरेको हो । पार्किङका लागि बजार क्षेत्रमा बुधहाट चोकको ‘ए’ र ‘बी’ प्लटमा व्यवस्था मिलाइएको छ । 

पार्किङ  निषेधित क्षेत्र घोषणा गरिएपछि विराटनगरको बुधहाट चोकदेखि जलजला चोकमा हुँदै आएको एकतर्फी ‘वान वे’ नियम दुई पाङ्ग्रे सवारी साधनका लागि हटेको छ । सो क्षेत्रमा सिटी सफारी सहितका अन्य सवारी साधनका लागि भने एकतर्फी कायम रहने छ । 

विराटनगर महानगरपालिकासँगको समन्वयमा सडकमा पार्किङ निषेध गरिएको जिल्ला ट्राफिक प्रहरी कार्यालय मोरङका प्रहरी निरीक्षक शिव पोखरेलले जानकारी दिए । पोखरेलका अनुसार, पार्किङ निषेध गरिएको क्षेत्रमा दैनिक ३ देखि ४ सय मोटरसाइकल र ६० देखि ७० चार पाङ्ग्रे गाडी पार्किङ हुने गरेका थिए ।

बजार क्षेत्रको अस्तव्यस्तलाई व्यवस्थापन गर्न पार्किङ निषेध गरिएको बताउँदै उनले तत्कालका लागि गुद्रीको ‘ए’ र ‘बी’ प्लटको खाली जग्गा र नमस्कार होटल अगाडी खाली रहेको जग्गालाई पनि पार्किङको रुपमा प्रयोग गरिने बताए । 

साउन १ गतेदेखि सार्वजनिक सवारी साधनले भाडादर देखिने स्थानमा टाँस्नु पर्ने, सार्वजनिक सवारी साधनका चालकले जुत्ता अनिवार्य लगाउनु पर्ने, कर्मचारीले अनिवार्य पचिय पत्र झुण्ड्याउनु पर्ने,  जेष्ठ नागरिक, अपांग र महिलाको सिट अनिवार्य आरक्षण गर्नु पर्ने व्यवस्था पनि कडाइका साथ कार्यान्वयनमा ल्याइने भएको छ ।

यसरी लागू गरिएको नियम साउन ७ गतेसम्म सूचित गरिने र त्यसपछि अटेर गरे कारबाही गरिने प्रहरी निरीक्षक पोखरेलले बताए ।